Միանձնյա իշխանություն եք, պաշտոններում ոչ կեղծարարներին նշանակեք. ԲՀԿ պատգամավոր

Ազգային ժողովում կառավարության կառուցվածքի փոփոխությունների նախագծի քննարկման ժամանակ ԲՀԿ պատգամավոր Գևորգ Պետրոսյանն անդրադարձավ իշխանական պատգամավորների` նախկին իշխանությունների վերաբերյալ հիշատակումներին:

«Գալիս եք, ամեն անգամ սկսում եք հիշել նախորդ իշխանությունների արածները։ Ա՛յ մարդ, էդ մարդիկ անցան-գնացին, ինչպես հայտնի երգի մեջ է ասվում` միայն հուշեր մնացին։ Հիմա դուք ի՞նչ եք անում։ Գյուղատնտեսության նախարարությունը լուծարելն ի՞նչ կապ ունի։ Ասում եք` ընտրությունները կեղծվել են, չգիտեմ` կեղծարարներ են պաշտոնների եղել։ Դուք էլ ոչ կեղծարարների նշանակեք, միանձնյա իշխանություն եք»,- ասաց պատգամավորը։

Պետրոսյանի խոսքով՝ պաշտոնների նշանակվում են մարդիկ, որոնք, եթե վկայականը կորցնեն, երեք օր չեն հիշի՝ ինչ են աշխատում, իսկ  լուծարվում են այն նախարարությունները, որոնց ոլորտները հենց կառավարությունն է սահմանել է որպես գերակա։

«Պետք է խնայել միջոցները՝ պետական կառավարման մարմիններում չնշանակելով այնպիսի անիրազեկ մարդկանց, որոնք ձախողում են ամբողջ համակարգը: Նրանցից են այն պատգամավորները, որոնք իրենց աշխատանքը համարում են «Ֆեյսբուք»-ը փորփրելը»,- ասաց նա։