Վստահության նշան է, որ Ծառուկյանի համարները Բելառուսի համարներ են եղել. Ծառուկյան

«Բարգավաճ Հայաստան» խմբակցության ղեկավար Գագիկ Ծառուկյանն այսօր խորհրդարանում անդրադարձավ Բելառուսի դիվանագիտական համարանիշերով ավտոմեքենայով երթևեկելու մասին` երեկ համացանցում տարածված լուսանկարին: Լրագրողների հետ զրույցում նա զարմանք հայտնեց. «Վատ է, որ Արարատի մարզ այցելելու ժամանակ ուշադրություն է գրավել ոչ թե այն, որ հանդիպել եմ ցուցարարներին, այլ այն, թե ինչ համարանիշով մեքենայով եմ եղել։ Ուրեմն` ես ասեմ նորից չհասկացողների համար, որ եթե ասեին՝ Ծառուկյանը խի ա գնացել, ինչ քայլ ա կատարել գյուղատնտեսության համար, ժողովրդի համար, խաղողագործության համար, մարդկանց հույս ա տվել, դուխ ա տվել, խնդիրներն ա կարգավորել, տրամադրել ա ամեն ինչ, ինչ հարց ասել են, տեղում լուծել եմ, մարդիկ գոնե բարի լինեն, ասեն` խի ա գնացել, ասում են՝ Ծառուկյանի մեքենայի համարը սև էր, սպիտակ, թե կարմիր էր»:

Նա հստակեցրեց` ով ընկերություն չունի, չի կարող հասկանալ, թե ինչու էին համարանիշերը կարմիր։ «Համարներն ինձ Բելառուսիան է տրամադրել։ Սա բարեկամական հարաբերությունների, վստահության ինչ-որ նշան ա, որ Ծառուկյանի համարները Բելառուսի համարներ ա եղել: Բոլորդ էլ գիտեք կապն էլ, հարգանքն էլ, վստահությունն էլ: Իսկ նրանք, ովքեր կարծում են, թե դիվանագիտական համարներով  շրջելն օրինական չէ, հորդորում եմ դիմել համապատասխան դեսպանատուն և ստանալ փաստաթղթերը, թե ինչ հիմքով են ինձ  դիվանագիտական համարանիշեր տրամադրել»,- եզրափակեց Ծառուկյանը: