Արտակ Խաչատրյանին հետապնդած մեքենայի համարները գրանցված չեն

ԲՀԿ-ական Արտակ Խաչատրյանին առեւանգելու, նրան ծեծի ենթարկելու գործով շրջանառվում է այն վարկածը, թե այդ ամենը հնարավոր է կազմակերպել է ԲՀԿ-ական պատգամավոր Աբրահամ Մանուկյանը:

Հիշեցնենք, որ փետրվար 13-ին պատգամավորին պատկանող «Քաղաքային ունիվերսալ բազա» ՍՊԸ-ում՝ «Հայկոոպ»-ի բազայում, ոստիկանները զննություն էին անցկացրել: Տեղեկություններ են շրջանառվում, որ գործի շրջանակներում հարցաքննվել է նաև Աբրահամ Մանուկյանի որդին` Արթուր Մանուկյանը:

Yerkir.am-ի հետ զրույցում ՀՀ քննչական կոմիտեից ո'չ հերքեցին և ո'չ էլ հաստատեցին այս փաստերը` նշելով, որ գործի շրջանակներում հարցաքննվել են տարբեր անձինք, և քննության շահերից ելնելով` հարցաքննված անձանց շրջանակը չեն կարող հրապարակել:

Հիշեցնենք նաև, որ այսօր լրագրողների հետ զրույցում Արտակ Խաչատրյանը հայտարարել էր, որ չի կարող բացառել կամ հերքել մի բան, որից տեղյակ չէ:

Նշենք նաև, որ Արտակ Խաչատրյանի եղբայրը` Արտյոմ Խաչատրյանը, ՀՀ քննչական կոմիտեին էր տրամադրել մի տեսանյութ, որում երևում էր, թե ինչ մեքենա է հետապնդում եղբորը: ՀՀ քննչական կոմիտեի տարածած հաղորդագրության համաձայն` տեսանյութից երևում է, որ դեպքի օրը Խաչատրյանին հետեւել է «Տոյոտա Կորոլա» մակնիշի սեւ ավտոմեքենա:

Այդ կապակցությամբ Արտակ Խաչատրյանն այսօր ասաց, որ իրեն մանրամասներ հայտնի չեն, միայն գիտի, որ, իրավապահների խոսքով, հետապնդած մեքենայի համարները գրանցված չեն եղել: