Իրանի նախագահը եռօրյա այցով ժամանել է Իրաք

Իրաքի նախագահի եւ վարչապետի հրավերով Իրանի Իսլամական Հանրապետության նախագահ  Հասան Ռոհանին եռօրյա պաշտոնական այցով այսօր ժամանել է Իրաք. տեղեկացնում է ԻՌՆԱ-ն:

Բաղդադ մեկնելուց առաջ նա հույս է հայտնել, որ այցը նպաստելու է բոլոր բնագավառներում երկու երկրների հարաբերությունների ամրապնդմանն ու ընդլայնմանը:

Անդրադառանալով վերջերս ԱՄՆ նախագահի իրաքյան այցին`Ռոհանին նշել է, որ Իրաքի հետ Իրանի հարաբերությունները համեմատության որեւէ եզր չեն կարող ունենալ ԱՄՆ-ի պես օկուպանտ երկրի եւ Իրաքի հարաբերությունների հետ:

Եռօրյա այցի ընթացքում Ռոհանին հանդիպելու է Իրաքի նախագահի, վարչապետի, խորհրդարանի նախագահի եւ պատգամավորների հետ: Քննարկվելու են ամենատարբեր բնագավառներում երկկողմ հարաբերությունները, դրանց ամրապնդման եւ ընդլայնման հնարավորություններն ու հեռանկարները: Անդրադարձ կկատարվի համատեղ հետաքրքրություն ներկայացնող միջազգային եւ տարածաշրջանային խնդիրներին: Նախատեսված է նաեւ հանդիպում  շիա աշխարհի բարձրագույն հոգեւոր առաջնորդներից մեկի՝  այաթոլլահ Սեյեդ Ալի Սիսթանիի հետ: