Մամուլի միջոցները իրավունք չունեն բարիկադավորվել. Սաթիկ Սեյրանյան

Այսօր լրագրողների հետ հանդիպման ժամանակ ժուռնալիստների միության նախագահ Սաթիկ Սեյրանյանն անդրադարձավ Հայաստանում հետհեղափոխական մամուլի ներկայիս իրավիճակին և անկախ մամուլի խոչընդոտներին:

Ըստ Սաթիկ Սեյրանյանի, հետհեղափոխական մամուլի համար, թվում էր, թե ստեղծվել են նոր հնարավորություններ, սակայն կարճ ժամանակ անց ակնհայտ դարձան մի շարք խնդիրներ: Նախ մամուլը ոչ միշտ սկսեց կատարել անկախ և օբյեկտիվ տեղեկատվություն մատուցելու իր գործառույթը, այնուհետ մամուլի որոշ ներկայացուցիչներ սկսեցին հանդես գալ իշխանության այս կամ այն թևի շահերի պաշտպանության տեսանկյունից, հակառակ կողմին քննադատելով ու դատելով: Այդ երևույթը ուներ ինչպես օբյեկտիվ, այնպես էլ սուբյեկտիվ պատճառներ:

«Բոլոր դեպքերում կարող ենք փաստել, որ մեդիան պատվով կատարեց հեղափոխական իրավիճակում իրեն վերապահված դերը»,- ասաց Սաթիկ Սեյրանյանը` հավելելով, որ մամուլում այսօր էլ կան լուրջ խնդիրներ ու մարտահրավերներ: Ֆորմալ առումով մամուլի անկախության և օբյեկտիվության համար առկա են բոլոր պայմանները, սակայն մյուս կողմից հասարակության մեջ ձևավորված մթնոլորտը խոչընդոտում է անկախ մամուլի գործունեությանը:

Դեռևս հեղափոխական օրերին հասարակությունը բաժանվեց սևերի ու սպիտակների, ներկաների ու նախկինների, յուրայինների ու օտարների, ինչը ազդեց մամուլի գործունեության վրա: Իշխանությանը ոչ հաճո որևէ հրապարակում արժանանում էր սոցցանցային դատարանի անխնա քննադատությանը, ընդհուպ մինչև անվտանգությանը ուղղված սպառնալիքներ: Ըստ Սեյրանյանի, այս պայմաններում լրագրողների համար շատ դժվար է աշխատելը:

«Մամուլի անկատար վիճակը անմիջապես պրոեկտվում է հանրային կառավարման համակարգի մյուս ենթահամակարգերի վրա: Պետք է գտնել այս խնդիրների լուծման համակարգային ճանապարհներ: Մամուլի միջոցները իրավունք չունեն բարիկադավորվել, ինչպես քաղաքական թիմերը»,- ասաց Սաթիկ Սեյրանյանը: