Ինչո՞ւ պետք է ամաչենք մեր այն օրհներգից, որն ունի 140 տարվա պատմություն. Մարինե Մուշեղյան

Գրականության և արվեստի թանգարանի ավագ գիտաշխատող, երաժշտական արխիվի երաժշտական բաժնի պատասխանատու Մարինե Մուշեղյանն այսօր հայտարարեց, որ հանրությանն անհայտ փաստ ունի  ՀՀ գործող օրհներգի ծագումնաբանության մասին:

«Դժվար թե ես համարձակություն ունենայի այստեղ հայտնվելու, եթե չլիներ մի շատ կարևոր հանգամանք. Կոմիտասի թանգարանում Ալեքսանդր Սիրանոսյանի հետ դասախոսություն ենք ունեցել, հետաքրքիր փաստեր էինք գտնել, որոնք ներկայացրեցինք լեցուն դահլիճին: Եվ այսօր, երբ ակտուալ է դարձել օրհներգը փոխել-չփոխելու հարցը, պարտիզանական լռություն է պահում այդ շերտը»,- ընդգծեց նա:

Մուշեղյանը հիշեցրեց, որ Միքայել Նալբանդյանի բանաստեղծությունը 1861-ին է տպագրվել, իսկ 1879 թվականին Եզնիկ քահանա Երզնկյանցի գրքում կա նոտագրությունը:

«Նա առաջինն էր, որ նոտայագրեց:  Հիմա նա՞ էր մեղեդու հեղինակը, թե՞ ոչ: Տարածված երգ էր, նա լսել, ձայագրե՞լ է, չենք կարող ասել:  Ուզում եմ շեշտել՝ 1879  թվականից, այսինքն`մեր օրհներգը ունի պատմություն, պետք է ծանոթանալ, բազային գիտելիքներ ձեռք բերել, նոր խոսել փոխել-չփոխելու մասին: Ինչո՞ւ մենք պետք է ամաչենք մեր այն օրհներգից, որն ունի 140 տարվա պատմություն»,- նշեց գիտաշխատողը: