Սուպերվարչապետական համակարգը կարելի է փոխել մեկ օրում, բայց դա անիշխանություն կբերի. վարչապետ

Սուպերվարչապետական համակարգի փոփոխությանը պետք է բալանսավորված գնալ. լրագրողների հետ զրույցում հայտարարեց վարչապետ Նիկոլ Փաշինյանը:

«Մարդիկ ուզում են, որ դա մեկ օրում արվի: Այո, դա կարելի է մեկ օրում անել, բայց հանկարծ կարող է պարզվել, որ ամբողջ իշխանությունը կաթվածահար եղավ, և երկրում անիշխանություն ստեղծվեց: Անկեղծ ասեք ` այդ ի՞նչ սպառնալիք ենք մենք ստեղծում այսօր երկրում ժողովրդավարության, թափանցիկության համար: Այսօր Հայաստանի պետական կառավարման համակարգը թափանցիկ է` առավել քան երբևէ: Ուզում եմ շնորհակալություն հայտնել բոլոր այն մարդկանց, որոնք դրա համար ջանք են թափում: Դա մեր սկզբունքն է և այնպես չէ, որ մենք հասել ենք կառավարական աթոռների և դրանից հետ ենք շրջվում: Ի՞նչ է տեղի ունեցել, այսինքն: Համոզվեցիք, թե վերջին 9 ամիսներին Հայաստանում դիկտատուրա՞ է հաստատվում»,- ասաց նա:

Դիտսարկմանը` երբ պատգամավոր էիք, ասում էիք` կառավարությանը պետք է անպայման ասող լինի, Փաշինյանը կատակով արձագանքեց. «Հիմա կա ասող, ես եմ այդ ասողը»:

Հակադարձմանը` ասողն էլ է, լսողն էլ, Փաշինյանը պատասխանեց. «Կառավարությանը ասող կա, և խորհրդարանն այդ դերը ստանձնում է ու կշարունակի ստանձնել»: