Իրանը որեւէ երկրի թույլ չի տա իր շահերի դեմ դաշինք ձևավորել. Իրանի ԱԳՆ տեղակալ

Իրանը որեւէ երկրի թույլ չի տա իր շահերի դեմ դաշինք ձեւավորել. Այս մասին հունվարի 20-ին Լեհաստանի ԱԳՆ տեղակալ Պրզեմիսլավ Լանգի հետ հանդիպման ժամանակ ասել է Իրանի ԱԳՆ քաղաքական հարցերով  տեղակալ Աբաս Արաղչին. տեղեկացնում է ԻՌՆԱ-ն:

«Իրանի Իսլամական Հանրապետությունը մշտապես ձգտել է տարածաշրջանում կայունության եւ խաղաղության հաստատմանը  եւ դա ապացուցել է ԻՊ-ի պես ահաբեկչական խմբավորումների դեմ պայքարի միջոցով»,- ասել է Արաղչին՝ հավելելով. «Մենք տարածաշրջանային կամ արտատարածաշրջանային որեւէ երկրի թույլ չենք տա մեր շահերի դեմ դաշինք ձեւավորել»:

Նա  նշել է, որ տարածաշրջանում առկա ճգնաժամը պայմանավորված է Իսրայելի զավթողական քաղաքականությամբ, եւ տարածաշրջանի հիմնական մարտահրավերը սիոնիստական վարչակարգն է ու դրա վարած զավթողական եւ ամբողջատիրական քաղաքականությունը: Ըստ նրա՝ քանի դեռ Պաղեստինի ժողովրդի իրավունքները չեն վերականգնվել, Արեւմտյան Ասիայի տարածաշրջանում անդորր չի հաստատվելու:

Անդրադառնալով Վարշավայում կայանալիք «Խաղաղությունն ու անվտանգությունը Մերձավոր Արեւելքում» խորագրով խորհրդաժողովի օրակարգին` Արաղչին ասել է, որ օրակարգը  վկայում է միակողմանի մոտեցման մասին  եւ ապացուցում, որ, նման խորհրդաժողով կազմակերպելով, ԱՄՆ-ն այլ նպատակներ է հետապնդում:

Ըստ ԻՌՆԱ-ի` Լեհաստանի ԱԳՆ տեղակալը նշել է, որ իր երկիրն ամբողջովին պաշտպանում է Իրանի հետ կնքված Միջուկային համապարփակ համաձայնագիրը, ու վստահեցրել է, որ խորհրդաժողովում քննարկվելու են Մերձավոր Արեւելքի անվտանգության եւ խաղաղության հետ կապված գլոբալ թեմաներ, եւ այն չի ունենալու հակաիրանական ուղղվածություն: