Էրդողանի ցանկությունը կյանքի են կոչում` Վանա լճի ափին նախագահական նոր պալատ կառուցելու նախագիծը ներկայացվել է մեջլիս

Թուրքիայի խորհրդարան է ներկայացվել Վանա լճի արևմտյան ափին՝ պատմական Խլաթում, նախագահական նոր պալատ կառուցելու նախագիծը:

Ըստ Demokrathaber-ի` այդ ծրագրի մասին Թուրքիայի նախագահ Ռեջեփ Թայիփ Էրդողանը խոսել էր դեռ ամիսներ առաջ` Մանազկերտի ճակատամարտում տարած հաղթանակի 947-ամյակին նվիրված միջոցառման ժամանակ:

«Ահլաթին կսազի մի նախագահական պալատ, քանի որ սուլթան Ալփարսլանն այստեղ տեղակայեց իր առաջին վրանը: Մենք էլ` որպես իր ժառանգներ, այստեղ մի «վրան» դնենք»,- ասել էր Էրդողանը:

Ուշագրավն այն է, որ Վանա լճի ափին շինարարական աշխատանքները փաստացի խախտելու են Թուրքիայի` ծովի կամ լճի անմիջապես ափին շինությունների կառուցումն արգելող օրենքը: