Արյան հետ կապված հանցագործություններում չի կարող լինել որևէ կոմպրոմիս. Փաշինյան

Արյան հետ կապված հանցագործություններում չի կարող լինել որևէ կոմպրոմիս. Իջևանում «Իմ քայլի» քարոզարշավի ժամանակ, խոսելով անցումային արդարադատության մասին, հայտարարեց ՀՀ վարչապետի պաշտոնակատար Նիկոլ Փաշինյանը:

Նա նշեց, որ երկրում տեղի են ունեցել իրադարձություններ, որոնք պայմանականորեն կարելի է բաժանել երկու մասի` արյան հետ կապված հանցագործություններ և արյան հետ չկապված հանցագործություններ: «Իմ մոտեցումն այն է, որ արյան հետ կապված հանցագործությունները որևէ պարագայում չի կարելի ներել, քանի որ կա շատ պարզ  սկզբունք` եթե մարդը մահացել է, նրան չենք կարող հետ վերադարձնել: Եվ եթե նույնիսկ այդ մարդու հարազատներին միլիոններ էլ տան, միևնույն է, այդ մարդուն չեն կարող վերադարձնել: Հասցված է անդառնալի վնաս: Իսկ եթե գողացվել է փող, կարելի է այդ փողը վերադարձնել, և հանրությունը կարող է դա ձևակերպել որպես իր պահանջ»,- ասաց Փաշինյանը:

Նրա խոսքով` պետք է գտնել այնպիսի մեխանիզմ, որը հնարավորություն կտա թալանված միջոցները վերադարձնելու պետբյուջե և  այն ծառայեցնելու առաջին հերթին ԶՈւ-ի ուժեղացմանը: