Լավրովը կոչ է արել Արևմուտքին` սանձել Կիևի իշխանություններին

Ռուսաստանը կոչ է անում արևմտյան երկրներին` թույլ չտալ Կիևին սրել իրավիճակը Ուկրաինայի հարավ-արևելքում:

«Խստորեն կոչ ենք անում Կիևի արևմտյան հովանավորներին` ամեն դեպքում սանձել բոլոր նրանց, ովքեր փորձում են ռազմական հիստերիայի ֆոնին քաղաքական միավորներ շահել սպասվող ընտրությունների կամ Ուկրաինայում այլ իրադարձությունների հետ կապված»,- ասել է Լավրովը:

Նա Կերչի նեղուցում կատարվածը «սադրանք» է որակել:

Նույն կարծիքն է հայտնել նաև ՌԴ նախագահի մամուլի խոսնակ Դմիտրի Պեսկովը:

Երեկ ուկրաինական մի քանի նավեր հատել են ՌԴ-ի սահմանը: Դրանք մտել են ռուսական` ժամանակավորապես փակ ջրատարածք և չեն ենթարկվել ռուսական կողմի նախազգուշացումներին: Ռուսական կողմը կրակ է բացել, վիրավորվել է 3 ուկրաինացի զինվորական, նրանց բժշկական օգնություն են ցույց տվել, կյանքին սպառնացող վտանգ չկա: Նավերը ձերբակալվել են:

ՌԴ-ն քրեական գործ է հարուցել և ՄԱԿ-ի Անվտանգության խորհրդի շտապ նիստ հրավիրել Ազովի ծովում ստեղծված իրավիճակի հետ կապված:

Ուկրաինան կատարվածից հետո ռազմական դրություն հայտարարելու մասին որոշում է կայացրել: