Ադրբեջանում բարձրացած աղմուկից հետո Բաքվին հրավիրեցին Արևելյան գործընկերության վեհաժողովին

Արդեն տեղեկացրել ենք, որ Թբիլիսիում դեկտեմբերի 10-12-ը կկայանա «Արևելյան գործընկերության» քաղաքացիական հասարակության ֆորումի  ամենամյա` 10-րդ վեհաժողովը, որին, ըստ Haqqin.az-ի դիվանագիտական աղբյուրների, Ադրբեջանի ղեկավարությանը չէին հրավիրել:

Ադրբեջանում բարձրացած աղմուկից հետո, ինչպես նշում է կայքը, Ադրբեջանի կառավարությունը ստացել է համապատասխան հրավերը: Այդ մասին Trend-ին ասել են Ադրբեջանում ԵՄ ներկայացուցչությունում:

Բաքվին  հուզում էր նաև մեկ այլ փաստ` ամփոփիչ հռչակագրում, ըստ աղբյուրների, աջակցություն կլինի Վրաստանի ու Ուկրաինայի տարածքային ամբողջականությանը և կբացակայի եվրոպական հասարակության վերաբերմունքը Ադրբեջանի «տարածքային ամբողջականության» և ԼՂ հակամարտության հետևանքների նկատմամբ:

Ներկայացուցչությունում, սակայն, նշել են, որ փաստաթուղթը դեռ մշակման փուլում է: