Սփյուռքի նախարարությունը նոր մշակույթ է մտցրել` տեսակապեր են հաստատում հեռավոր համայնքների հետ

Նոր մշակույթ  է մտցվել, մենք յուրաքանչյուր շաբաթ տեսակապեր ենք հաստատում հիմնականում ամենահեռավոր համայնքների հետ. նախարարության 6-ամսյա գործունեությունն ամփոփող ասուլիսի ժամանակ տեղեկացրեց Սփյուռքի նախարարի պաշտոնակատար Մխիթար Հայրապետյանը:

«Մասնավորապես` նախարարությունն առաջին անգամ պատմության մեջ տեսակապով միացումներ ունեցավ հեռավոր հայկական համայնքների հետ` Ուրուգվայի հայ համայնքի, Հնդկաստանի Դելիի փոքրաթիվ հայ համայնքի հետ, ինչը մեծ ոգևորություն առաջացրեց համայնքի ներկայացուցիչների մոտ»,- ասաց նախարարի պաշտոնակատարը:

Հայրապետյանը նշեց, որ դա շարունակական է լինելու: «Այս շաբաթ լինելու է Ուկրաինա, Իսրայել և այլն: Փորձելու ենք օգտագործել 21-րդ դարի տեխնոլոգիաները և սրանով իսկ ցույց տալ, որ անհնարին ոչինչ չկա: Յուրաքանչյուր համայնքի հետ, եթե այնտեղ անգամ լինի 7 հայ, ինչպես Լաոսի հայ համայնքում է, մենք փորձել ենք կապ հաստատել, սակայն Լաոսի հետ դեռ չի ստացվել: Մենք սրանով ցույց ենք տալիս, որ նախարարության համար կարևոր է աշխատել բոլոր համայնքների հետ` նրանց սեփական տարբեր օրակարգերով»,- հայտնեց նախարարի պաշտոնակատարը: