Այսօր շատ աղմկոտ գործերի քննությունն իրականացվում է, որովհետև վարչապետը ես եմ. Փաշինյան

Վարչապետի պաշտոնակատար Նիկոլ Փաշինյանը տեղեկատվություններին տիրապետում է, որովհետև իրեն այդ թեմաներով հարցեր են տալիս լրագրողները, պատգամավորները, միջազգային կազմակերպությունները: Մամուլի ասուլիսում,  անդրադառնալով հարցին` ինչպե՞ս է ստացվում, որ տիրապետում է բոլոր աղմկոտ գործերի մանրամասներին, բայց մի քանի ամիս առաջ հայտարարում էր, որ չի խառնվելու դատական համակարգի գործերին, նա պատասխանեց. «Ես պետք է որոշակի տեղեկատվության տիրապետեմ, որ այդ հարցերին պատասխանեմ: Այդ գործերով զբաղվում են ոստիկանությունը և ԱԱԾ-ն, որոնք վարչապետին առընթեր մարմիններ են: Այդ ողջ գործընթացը որոշակի քաղաքականացվում է, և ես չեմ կարող չտեղեկանալ: Աշխարհաքաղաքական հարթակներում հարցադրումներ են լինում, և ես չեմ կարող այդ հարցերին չտիրապետել: Դա չի նշանակում, որ ես քննությանը ինչ-որ ձևով միջամտում եմ»:

Նա օրինակ բերեց, թե դեպք է եղել, որ պաշտոնյա են ձերբակալել, քաղաքական մեծ աղմուկ է առաջացրել, և ինքը տեղյակ չի եղել: «Հետո ասել եմ` տեղեկացրեք, որ լրագրողների հարցերին պատասխանեմ»,- նշեց վարչապետի պաշտոնակատարը:

Փաշինյանը նշեց, որ այսօր շատ աղմկոտ գործերի քննությունը իրականացվում է, որովհետև վարչապետն ինքն է: Նրա խոսքով` նախկին իշխանությունների ժամանակ կա'մ այդ գործերով քննություն չէր իրականացվի, կա'մ այդ քննությունը կիրականացվեր իշխանությանը ցանկալի ընթացքով:

Հիշեցնենք, որ երբ Նիկոլ Փաշինյանը վարչապետի թեկնածու էր, հայտարարում էր, որ չի լինելու այս երկրի ոստիկանապետը, ԱԱԾ պետը, դատախազը, ՀՔԾ պետը, այսինքն` չի միջամտելու իրավապահների աշխատանքներին, քաղաքական պատվերներ չեն լինելու: Սակայն այս ընթացքում Նիկոլ Փաշինյանը իրավապահ համակարգին վերաբերող բազմաթիվ աղմկոտ հայտարարություններ է արել: Նա հայտնել էր, որ Սերժ Սարգսյանի եղբայրը՝ Ալեքսանդր Սարգսյանը, իր միայն մեկ հաշվի վրա 30 միլիոն դոլար ունի, որը պետք է պետբյուջե վերադարձվի: Իսլ վարչապետի ընտրության ժամանակ խորհրդարանում նշել էր, որ շուտով պատգամավոր է ձերբակալվելու՝ կաշառքի գործով, և դա լինելու է 3-րդ հանրապետության ամենասկանդալային կոռուպցիոն բացահայտումը: Փաշինյանը նաև հայտարարել էր, թե Մարտի 1-ի գործն, ըստ էության, ամբողջ ծավալով բացահայտված է: