Ժիրայր Սեֆիլյանին քաղաքացիություն շնորհելուն Արդարադատության նախարարությունը դրական եզրակացություն է տվել. Զեյնալյան

Քաղաքացիությունը շնորհում է նախագահը, մենք դրական եզրակացությունը տվել ենք. այս մասին այսօր լրագրողների հետ զրույցում ասաց Արդարդատաության նախարարի պաշտոնակատար Արտակ Զեյնալյանն` անդրադառնալով հարցին` ինչ դիրքորոշում ունի նախարարությունը` «Շուշիի առանձնակի գումարտակ»-ի հրամանատար Ժիրայր Սեֆիլյանին քաղաքացիություն տրամադրելու հարցում:

Հարցին` խնդիրը նախագահի տիրույթո՞ւմ է, Զեյնալյանը պատասխանեց. «Քաղաքացիություն տրամադրելու խնդիրը լուծված է»:

Նշենք, որ Yerkir.am-ի հետ զրույցում «Սասնա ծռեր» կուսակցության ԶԼՄ հարցերով պատասխանատու Հերմինե Մկրտչյանը հայտնել էր, որ Ժիրայր Սեֆիլյանը որպես թեկնածու չի կարող ընդգրկվել նախընտրական ցուցակում, քանի որ նրան այդպես էլ ՀՀ քացաքացիություն չշնորհվեց: Մկրտչյանը մեզ հետ զրույցում հայտնել էր, որ Սեֆիլյանին հետին թվով հրաժարվում են քաղաքացիություն տրամադրել, Սեֆիլյանը դիմել է նաև բնականոն ընթացակարգով քաղաքացիություն ստանալու համար, դիմումն ընթացքի մեջ է, սակայն դա էլ անհասկանալի պատճառներով հետաձգում են:

Սեֆիլյանը քաղաքացիություն ստանալու համար դիմել էր դեռևս օգոստոսի 2-ին: