Խաչատուրովը Հայաստանում է նոյեմբերի 4-ից. նրա նկատմամբ քննչական որևէ գործողություն չի կատարվել

ՀԱՊԿ նախկին գլխավոր քարտուղար Յուրի Խաչատուրովը վերադարձել է Երևան: Նրա պաշտպանը՝ Միհրան Պողոսյանը, Yerkir.am-ի հետ զրույցում նշեց, որ Խաչատուրովը Հայաստան է վերադարձել նոյեմբերի 4-ին:

«Մինչ օրս նրա նկատմամբ որևէ քննչական գործողություն չի կատարվել: Խաչատուրովի դիրքորոշումն իր դեմ հարուցված գործի վերաբերյալ չեզոք է: Սպասում ենք գործի ընթացքին: Նա համոզված է, որ ինչ գործողություն իրականացրել է, ամեն ինչ արել է օրենքով սահմանված կարգով: Այս ամենը քրեական գործի քննությունը կապացուցի»,- ասաց պաշտպանը:

Հիշեցնենք, որ Խաչատուրովին մեղադրանք է առաջադրվել ՀՀ քրեական օրենսգրքի 300.1 հոդվածով՝ սահմանադրական կարգը տապալելը: Նրա նկատմամբ կիրառվել է խափանման միջոց գրավը: