Ազատության հրապարակում մեկնարկեց «Հանուն ազգային արժեքների» հանրահավաքը

«Հանուն ազգային արժեքների» նախաձեռնության կազմակերպած հանրահավաք-երթը մեկնարկեց Ազատության հրապարակում: Նպատակն ազգային-հոգևոր և ընտանեկան արժեքներին տեր կանգնելն է:

Yerkir.am-ի թղթակցի հաղորդմամբ` միջոցառման մասնակիցները քաղաքացիներին են ներկայացնում իրենց պատրաստած նամակը, որի տակ ստորագրում են վերոնշյալ արժեքների դեմ որևէ քայլ անընդունելի համարողները:

Մեզ հետ զրույցում նախաձեռնության մասնակիցներից մեկը նշեց, որ ստորագրահավաքից հետո պահանջ-նամակը կներկայացվի ԱԺ-ին, վարչապետին և նախագահին:

Հանրահավաք-երթը, ինչպես նաև ստորագրահավաքը միտված են նոյեմբերի 15-18-ը Հայաստանում նախատեսվող` Արևելյան Եվրոպայի և Կենտրոնական Ասիայի երկրների ԼԳԲՏ «քրիստոնյաների» ֆորումի չեղարկմանը և անչափահասների շրջանում սեռական բնույթի քարոզչությունն արգելող օրինագծի ընդունմանը:

«Հանուն ազգային արժեքների» նախաձեռնության երթը կմեկնարկի 17:30-ին` Ազատության հրապարակից դեպի Մաշտոցի պողոտա-Մատենադարան, հետադարձը` Ֆրանսիայի հրապարակից դեպի Բաղրամյան 26:

Ի դեպ, ՀՀ ոստիկանապետ Վալերի Օսիպյանն այսօր լրագրողներին վստահեցրել էր, որ ԼԳԲՏ ֆորումը Հայաստանում չի անցկացվելու: