Նորանշանակ մարզպետը նպատակ ունի հեղափոխության շունչը հասցնել Վայոց ձոր

Կառավարության նիստից հետո լրագրողները Վայոց ձորի նորանշանակ մարզպետ Տրդատ Սարգսյանին հարցրեցին առաջիկա անելիքների մասին:

Նրա խոսքով` Վայոց ձորի բնակչությունը դժգոհություն էր հայտնում, որ հեղափոխությունը չի հասել Վայոց ձոր, և երբ առաջարկ է ստացել վարչապետից` զբաղեցնել մարզպետի պաշտոնը, առանց երկար մտածելու միանգամից համաձայնել է, որպեսզի հեղափոխության շունչը հասնի Վայոց ձոր:

Հեղափոխությունը չի հասել Վայոց ձոր, որովհետև, ըստ Տրդատ Սարգսյանի, վերաբերմունքի փոփոխություն չի եղել, նախկին մարզպետը նախկին ՀՀԿ-ական էր, հետո դարձավ ԲՀԿ անդամ: Նոր  մարզպետի խոսքով` այս ամիսների ընթացքում նախկին մարզպետի քայլերից որևէ առերևույթ առաջընթաց չեն տեսել:

Հիշեցնենք, որ նախորդ մարզպետը Արագած Սաղաթելյանն էր, ով նշանակվել էր պաշտոնին որպես ԲՀԿ-ական և ազատվեց պաշտոնից քաղաքական հայտնի հանգամանքների բերումով: Ըստ Տրդատ Սարգսյանի՝ բնակիչները փոփոխությունը կզգան, իսկ ամիսների ընթացքում կզգան նաև բարեկեցությանն ուղղված քայլերի արդյունքները: