Աշխատող ծրագրեր են. մարզպետը՝ Վայոց ձորից ներկայացված նեդրումային ծրագրերի մասին

Երեկ` հունվարի 12-ին, կառավարությունում տեղի է ունեցել խորհրդակցություն, որի ընթացքում քննարկվել են ՀՀ Վայոց ձորի մարզից ներկայացված ներդրումային ծրագրերը: Նշենք, որ բիզնես ծրագրերը վերաբերում էին օրգանական գյուղմթերքի վերամշակմանը, կաթնամթերքի արտադրության զարգացմանը, ջերմոցային տնտեսությունների ընդլայնմանը, զբոսաշրջային հնարավորությունների կազմակերպմանը և այլն:

Վայոց ձորի մարզպետ Հարություն Սարգսյանը Yerkir.am-ի հետ զրույցում նշեց, որ ներկայացված ծրագրերը վեցն էին: Ըստ մարզպետի՝ մինչ վարչապետի մոտ քննարկելը, այդ ծրագրերը քննարկվել էինն տարածքային կառավարման և զարգացման նախարարությունում և հետո արդեն ներկայացվել գործադիրի ղեկավարին:

«Հիմնականում գյուղատնտեսության ոլորտին վերաբերող ծրագրեր են:  «Գոլդեն գուոթ» ՍՊԸ-ի ծրագիրն էր, որը վերաբերում է այծի պանրի գնմանը,  վերամշակմանը, ներկայացվել է այդ ամենի ընդլայնման ծրագիր: Այծաբուծությանը վերաբերող նմանատիպ երկու ծրագիր է ներկայացվել:  «Եղեգնաձորի պահածոների գործարան» ՍՊԸ-ն էր ծրագիր ներկայացրել՝ էլի ընդլայնման հետ կապված, հիմնականում օրգանիկ պահածոներ և չրամրգեր են առաջարկում արտադրել: Երկու  հատ արևային ջերմոցների ծրագիր է, և «Նելսոն»  ՍՊԸ-ն զբոսաշրջության զարգացման ծրագիր էր ներկայացնում,` բնակելի քոթեջներ, ձիաբուծարան, ձիարշավարան: Այս ամենը փորձում են ընդայնել»,- ասաց մարզպետը:

Նա կարծիք հայտնեց, որ ներկայացված ծրագրերը կենսունակ են:  «Սրանք աշխատող ծրագրեր են, դրանց արտադրանքը սպառման խնդիր չունի: Այսինքն՝ այծի պանիրն ինչքան շատ արտադրվի, այնքան  լավ: Արտադրանքն արտահանվում է Ռուսաստան. պահանջարկը մեծ է»,- նշեց Սարգսյանը՝ հավելելով.  «Նույնը պահածոների գործարանն է և մնացած այլ ծրագրերը: Բոլորին ևս մեկ անգամ հանձնարարություններ տրվեցին որպեսզի մանրակրկիտ ուսումնասիրվեն բիզնես ծրագրերը: Գործատուներին հրավիրել են քննարկման: Կարծում եմ՝ այս  բոլոր ծրագրերն էլ կյանքի կոչվող են, և  այս կարգի շատ ծրագրեր ունենք: Սրանք պետք է ուղարկենք տարածքային կառավարման նախարարություն, որպեսզի գնա կառավարություն և քննարկվի»:

Նշենք նաև, որ քննարկման արդյունքում կլուծվի ծրագրերի համաֆինանսավորման ու վարկավորման հարցը: