Մարուքյանի հարցադրումն անվստահություն էր գործող կառավարությանը. Արմեն Աշոտյան

Հայտնել ենք, որ այսօր ԱԺ արտահերթ նիստում պատգամավորներն իրենց մտահոգությունը հայտնեցին բեռնատարներով ցորենի ներկրումն արգելելու Վրաստանի կառավարության որոշման մասին: Խնդրի մասին, մասնավորապես, խոսեց «Ելք» խմբակցության պատգամավոր Էդմոն Մարուքյանը:

ԱԺ ՀՀԿ խմբակցության պատգամավոր, արտաքին հարաբերությունների մշտական հանձնաժողովի նախագահ Արմեն Աշոտյանն էլ լրագրողների հետ զրույցում հայտարարեց, թե «Ելք» խմբակցության պատգամավոր Էդմոն Մարուքյանն անվստահություն հայտնեց գործող կառավարությանը:

Բանն այն է, որ Մարուքյանը հայտարարել էր` Վրաստան-Հայաստան խորհրդարանական բարեկամական խումբը ևս պետք է զբաղվի այս խնդրով:

«Պարոն Մարուքյանի հարցադրումը, փաստորեն, անվստահություն էր գործող կառավարությանը, որովհետև, եթե բարձացրած խնդրի լուծումը պետք է բարեկամական խումբը կարգավորի, ապա հասկանալի չէ, թե ինչով պետք է զբաղվի ՀՀ ԱԳ նախարարությունը»,- ասաց Աշոտյանը:

Պատգամավորը նաև շեշտեց, որ տվյալ պարագայում նաև դժվար է հասկանալ, թե տնտեսական ինչ արդյունքներ տվեց ՀՀ վարչապետ Նիկոլ Փաշինյանի՝ Վրաստան կատարած այցը: