Տիկի’ն, օրիո’րդ, Ձեր հարցադրումն աբսու’րդ է. Անի Զախարյանը հունից հանեց Գագիկ Հարությունյանին

«Ինձ թվում էր, որ Դուք այս տարիներին բացակայում էիք երկրից: Շատ ուրախ եմ այսօր Ձեզ տեսնել մեր երկրում»,- այսօր «Սահմանադրական բարեփոխումների հայեցակարգային հիմնահարցերի վերաբերյալ» հանրային քննարկման ժամանակ, դիմելով ՍԴ նախագահ Գագիկ Հարությունյանին, ասաց «Նոր քաղաքական մշակույթ» կուսակցության նախագահ Անի Զախարյանը: Նա մի քանի հարցեր ուղղեց Հարությունյանին:

Զախարյանն անդրադարձավ Վերահսկիչ պալատի բացահայտած խախտումներին, կուտակային կենսաթոշակային համակարգին, նվազագույն աշխատավարձին: «Այսօր մեր երկրում նվազագույն աշխատավարձը 45 հազար դրամ է: Արդյոք Սահմանադրական դատարանը չէ՞, որ մարդու արժանապատիվ կյանքի իրավունքը հենց այս օրենքի միջոցով պետք է կյանքի կոչի և ապահովի այնպեսի աշխատավարձ և թոշակ, որ մարդուն արժանապատիվ կյանքով ապահովեն»,- ասաց նա և հավելեց. «Մարդիկ 6-7 ամիս իրենց ռեսուրսներն ու ժամանակը դրեցին` հակասահմանադրական ճանաչելու համար «Կուտակային կենսաթոշակային համակարգի մասին» օրենքը, ինչպե՞ս եք պատրաստվում փոխհատուցել այդ մարդկանց բարոյական և ֆինանսական վնասները»:

Գագիկ Հարությունյանը Զախարյանին խորհուրդ տվեց հարց տալուց առաջ մտածել և նայել սրահում նստած բավարար իրավական գիտելիքներ ունեցող մարդկանց դեմքերին`տեսնելու համար, թե ի՞նչ ռեակցիաներ են առաջացնում իր տված հարցադրումները: «Հավանաբար, Ձեր ներկայությունն ավելի ակտիվ է, քան մյուսներինը, դրա համար մյուսների ներկայությունը Ձեզ համար բացակայություն է»,- ասաց ՍԴ նախագահը և հավելեց. «Դուք բացարձակապես անհիմն հարց եք ուղղում: ՍԴ-ն ընդամենը վեճ լուծող ինստիտուտ է: Կուտակայինի հետ կապված էլ` պարզապես կարելի էր ՍԴ-ի որոշումը կարդալ: Վերջին 6 տարիների ընթացքում մեր երկրի ՍԴ-ն ավելի շատ օրենքներ է հակասահմանադրական ճանաչել, քան Վրաստանը, Ադրբեջանը, Ռուսաստանը, Լիտվան, Մոլդովան` միասին վերցրած»:

Մինչ Հարությունյանը կշարունակեր իր միտքը, Զախարյանը նորից հիշեցրեց նվազագույն աշխատավարձերի հետ կապված իր հարցը, ինչը հունից հանեց ՍԴ նախագահին: «Չգիտեմ հիմա ես ասեմ տիկի’ն, օրիո’րդ, Ձեր հարցադրումն աբսու’րդ է, Դուք հարցադրում եք անում Սահմանադրական դատարանին, ով այդ հարցը չի քննել և մեր իրավասություն մեջ չի մտնում, բարի եղեք դիմում ներկայացնել»:

«Ամբողջ Հայաստանի Հանրապետությունը պետք է դիմո՞ւմ ներկայացնի»,- արձագանքեց Զախարյանը:

«Ավելորդ է Ձեզ հետ հարց քննարկել, որովհետև ես չեմ կարող իջնել այդ հարթության վրա»,- պաասխանեց ՍԴ նախագահը: 

Մանրամասները` yerkir.am-ի տեսանյութում: