Բողոքի ակցիաներին մասնակցած խաղաղապահ գնդի հրամանատարը զորացրման դիմում է գրել. Վիգեն Սարգսյան

Պաշտպանության նախարարի պաշտոնակատար Վիգեն Սարգսյանն այսօր հրավիրած ասուլիսում անդրադարձավ նաև ապրիլի 23-ի բողոքի ակցիաներին խաղաղապահ զորքերի մասնակցությանը:

Սարգսյանն ընդգծեց, որ զինվորականների մասնակցությունը քաղաքական ակցիաներին անթույլատրելի է: «Ապագա պաշտպանության նախարարին հոդորում եմ և խորհուրդ տալիս շատ կոշտ արձագանքել դեպքին ծառայողական քննության լիարժեք ավարտից հետո»,- հայտարարեց նա:

Նախարարի պաշտոնակատարը տեղեկացրեց, որ ինքն  ընդունել է զորամասի հրամանատարի հրաժարականի դիմումը: «Ընդունել եմ հրաժարականի դիմումը, ուղարկել եմ կառավարություն, որտեղից էլ դիմումն ուղարկվել է  նախագահի հաստատմանը»,- հայտնեց նա:

Սարգսյանը նշեց, որ ցավով է դա արել, որովհետև այդ զորամասի հրամանատարն իր համար շատ ընդունելի, հարգված զինծառայող է:

Ըստ նրա` 209 զինծառայողն էլ, ովքեր մասնակցել են բողոքի ակցիաներին, ևս կենթարկվեն համապատասխան պատասխանատվության:

Հիշեցնենք, որ խաղաղապահ բրիգադի հրամանատարի պաշտոնը զբաղեցնում էր գնդապետ Վաղինակ Սարգսյանը: Ապրիլի 23-ին ՀՀ ԶՈւ խաղաղապահ բրիգադի մի շարք զինծառայողներ լքել էին զորամասի տարածքը և մասնակցել անցկացվող ցույցերին: ՀՀ ՊՆ-ն քննադատել էր այս քայլը՝ հայտարարելով, որ բանակը պետք է դուրս լինի քաղաքականությունից և քաղաքական գործընթացներից: