21,5 միլիարդ դրամի ներդրում, 475 նոր աշխատատեղերի ստեղծում. Կարայանը ներկայացրեց հաստատված ծրագրերը

Այսօր` կառավարության նիստից հետո, տնտեսական զարգացման և ներդրումների նախարարի պաշտոնակատար Սուրեն Կարայանը լրագրողների հետ ճեպազրույցում անդրադարձավ ներդրումային ծրագրերին: Նա նշեց, որ այսօրվա նիստում երեք ներդրումային ծրագիր է հաստատվել, և դրանք միասին նախատեսում են 21,5 միլիարդ դրամի ներդրում ու 475 նոր աշխատատեղերի ստեղծում:

Ներդրումային ծրագրերն իրականացվելու են գինու և կոնյակի արտադրության ոլորտում, իսկ Արտաշատ քաղաքում` թեթև արդյունաբերության ոլորտի ծրագրեր:

Պետության կողմից տրամադրվող օժանդակ ծրագրերին վերջին տարում դիմել են երեք անգամ ավելի շատ գործարարներ: Սուրեն Կարայանը հույս հայտնեց, որ տնտեսական աշխուժացումը կշարունակվի:

Լրագրողների հարցին, թե ինչպե՞ս է անցել առաջին դռնփակ նիստը, Կարայանը պատասխանեց, որ նիստն անցել է բուռն քննարկման մթնոլորտում, այն ծանրաբեռնված է եղել` մոտ 73 հարց է քննարկվել: