Սարյանի տուն-թանգարանը բացվել է. կատարվել է 515 մլն դրամի ներդրում

Երեկ Մարտիրոս Սարյանի հիմնանորոգված տուն-թանգարանն իր դռներն է բացել այցելուների առջև:

«Հեքիաթն այսօր դարձավ իրականություն: Թանգարանի 50-ամյակի շեմին մենք ստացանք մի բացառիկ նվեր Հայաստանի կառավարությունից ու նախագահից: Դա Սարյանի թանգարանի արդիականացված շենքն է, որն ունի բոլոր այն հարմարությունները, որոնց մասին երազում էինք, և թվում էին անիրական»,- նշել է Մարտիրոս Սարյանի տուն-թանգարանի տնօրեն Ռուզաննա Սարյանը:

Հիմնանորոգման ծրագրի շրջանակում ամրացվել են շենքի հիմքերը, կրող պատերը, ինչպես նաև կառուցվել միջոցառումների համար նախատեսված առանձին դահլիճով լրացուցիչ 4-րդ հարկը, իսկ նախկին բաց պատշգամբը վերածվել է գրադարանի: Փոխվել են ջրամատակարարման, ջրահեռացման, հոսանքի սնուցման համակարգերը, ստեղծվել են հենաշարժական խնդիրներ ունեցող այցելուների մուտքը և ներսում նրանց տեղաշարժն ապահովող հնարավորություններ: Շենքը վերազինվել է նաև տեխնիկապես: Տուն-թանգարանը համապատասխանեցվել է ժամանակակից պահանջներին, ապահովվել են բոլոր անհրաժեշտ պայմանները թանգարանի այցելուների որակյալ սպասարկման, գիտական և կրթական ծրագրերի իրականացման համար:

Թանգարանի վերանորոգման և վերազինման նպատակով պետական միջոցներից տրամադրվել է շուրջ 460 միլիոն դրամ, ևս 55.5 միլիոն դրամ տրամադրվել է արտաբյուջետային միջոցներից:

2013  թվականի մայիսին մեկնարկած հիմնանորոգման աշխատանքներն ավարտվել են 2016 թվականի նոյեմբերին: