Մարզային ներդրումային 10 ծրագրերը հաստատված են, նաև հստակ են ֆինանսական աղբյուրները. Դավիթ Լոքյան

Մի քանի օր առաջ 6 մարզերից հավանության արժանացած 11 ներդրումային ծրագիր ներկայացրած գործարարների հետ կառավարությունում  կայացած հանդիպման ժամանակ քննարկվեցին  դրանց հետագա իրականացմանը վերաբերող հարցեր: Տարածքային կառավարման և զարգացման նախարար Դավիթ Լոքյանն այսօր բացել է փակագծերը և տեղեկացրել, որ  10 ծրագրերի ֆինանսավորման հետ կապված արդեն հստակ որոշումներ են կայացվել:

«10 ծրագրերը հաստատված են և   ֆինանսական աղբյուրները հստակ են, ձեռնարկատերերը փորձում են 1-2 շաբաթվա ընթացքում ստանալ համապատասխան միջոցները: Բացի դրանից նաև 12 համայնքապետերի հետ վարչապետի մոտ քննարկել ենք  արտադրական ուղղվածության բազմաթիվ ծրագրերը և վարչապետի գլխավորությամբ քննարկման արդյունքում որոշում է կայացվել այդ համայնքներին ուղղակի միջոցներ հատկացնել համայնք-պետություն համագործակցությամբ ծրագրերը ընթացքի մեջ դնելու համար»: 

Այս մասին նախարարն ասել է   «Մարտահրավերներից՝ հնարավորություններ» խորագրով երկօրյա համաժողովում լրագրողների բացման ժամանակ, տեղեկացրել, որ  Հայաստանում մարզերի  համաչափ զարգացումն ապահովելու և տնտեսությունը զարգացնելու համար  մարզային այցելությունների ժամանակ ներկայացվել են բազմաթիվ ներդրումային ծրագրեր:

Գործարարները, համայնքները դրանք ներկայացրել են  ՀՀ տարածքային կառավարման և զարգացման  նախարարություն,  բերվել բիզնես ծրագրի տեսքի, ներկայացվել կառավարության համապատասխան հարթակ: