Թուրք երգչուհին ազատազրկվել է երգում Էրդողանի անունը մեջբերելու և միջնամատ ցույց տալու համար

Թուրք երգչուհի Զուհալ Օլջայը 10 ամսով ազատազրկվել է երկրի նախագահ Ռեջեփ Թայիփ Էրդողանին իր երգում հիշատակելու համար։

Ըստ DHA-ի՝  դեռևս 2016 թվականին նա փոխել էր երգի բառերը՝ արտասանելով «Ռեջեփ Թայիփ Էրդողան, ամեն ինչ դատարկ է, ամեն ինչ` սուտ։ Մի օր այս կյանքը կավարտվի, և դուք կասեք՝ սա երազ էր»։

Երգչուհուն նաև մեղադրել են կատարման ընթացքում միջնամատ ցույց տալու համար։

Օլջայը կտրականապես մերժել է իր դեմ առաջադրված մեղադրանքները՝ նշելով, որ միջնամատ ցույց է տվել հանդիսատեսներից մեկին, ով ելույթի պահին նկատողություն է արել իրեն։ Նա երգի բառերը փոխելու իր որոշումը բացատրել է նրանով, որ այդպես հանգերն ավելի լավ են հնչում: