Ադրբեջանի սպառազինության վերաբերյալ միջազգային զեկույցում ներկայացված տվյալները ճիշտ չեն. վերլուծաբան

Ստոկհոլմի խաղաղության հարցերով միջազգային հետազոտական ինստիտուտի (SIPRI) կողմից սպառազինման միջազգային առքուվաճառքի մասին նոր զեկույցի համաձայն՝ 2017-ին Ադրբեջանը մի քանի անգամ ավելի շատ զենք է ձեռք բերել, քան Հայաստանը: Վերլուծաբան Տարոն Հովհաննիսյանն այսօր լրագրողներին հայտնեց, որ ներկայացված տվյալները վերցված են բաց աղբյուրներից, որոնք միշտ չէ, որ ճիշտ են:

Նրա խոսքով՝ օրինակ, Հայաստանի կողմից զենքի գնման ոչ բոլոր գործարքներն են բաց եղել: Բացի այդ` պետք է նշել, որ Ադրբեջանի կողմից ձեռք բերված տեխնիկաների թվում կան նավեր, որոնք որևէ կապ չունեն Արցախյան հակամարտության հետ և չեն կարող անդրադառնալ տարածաշրջանում զենքի հավասարակշռության վրա:

Հովհաննիսյանի կարծիքով՝ Հարավային Կովկասը SIPRI-ի ուշադրության կենտրոնում չէ, և դա է պատճառը, որ նրանց ներկայացրած տվյալներում մշտապես առկա են թերություններ:

«Օրինակ` 2016թ.-ին հրապարակված զեկույցում Ադրբեջանին վաճառված սպառազինությունների ցանկում ներկայացված էր իսրայելական արտադրության «Երկաթե գմբեթ» համակարգը, բայց դրանից հետո Ադրբեջանի ռազմարդյունաբերության նախարարը հայտարարեց, որ դեռևս բանակցություններ են ընթանում այդ զինատեսակը ձեռք բերելու ուղղությամբ»,- ասաց նա: