Թուրքիայում 10 տարում ամուսնալուծվել է 1 մլն 200 հազար զույգ. զեկույց

Թուրքիայում ամուսնությունների և ամուսնալուծությունների մասին նոր զեկույց է հրապարակվել, համաձայն որի` երկրում նվազել է ամուսնությունների և աճել՝ ամուսնալուծությունների թիվը:

Ըստ Demokrathaber-ի՝ ամուսնալուծությունների ամենաշատ դեպքերը գրանցվել են Պոլսում:

2017 թվականի տվյալներով՝ ամուսնալուծությունների թիվը եղել է 128 հազար 411, որը, 2016 թվականի համեմատ, աճել է 1.8 տոկոսով:

Նախորդ տարվա ընթացքում տղաների համար ամուսնության միջին տարիքը եղել է 27-ը, իսկ աղջիկներինը՝ 24-ը: Զույգերի միջև տարիքային տարբերությունը եղել է 3 տարի:

Զեկույցում չեն ներառվել անչափահասների ամուսնության, ինչպես նաև ամուսնալուծությունից հետո նույն տանը ապրել շարունակող զույգերի տվյալները, սակայն տեղ են գտել օտար ամուսնությունների մասին տվյալներ: Համաձայն դրանց՝ նախորդ տարվա ընթացքում օտար աղջիկների հետ ամունությունների թիվը կազմել է 20.972: Նրանք հիմնականում եղել են սիրիացի, ադրբեջանցի կամ գերմանացի: Օտար տղամարդկանց հետ ամուսնությունների թիվը համեմատաբար քիչ է՝ 3782: Նրանք հիմնականում եղել են գերմանացի, սիրիացի և ավստրիացի:

Ինչ վերաբերում է ամուսնալուծություններին՝ Իզմիրը, Անթալիան և Մուղլան եղել են այն նահանգները, որտեղ գրանցվել են ամունալուծությունների ամենաշատ դեպքերը:

Ուշագրավ է, որ ամուսնալուծությունների մեծ մասը եղել է ամուսնության առաջին 5 տարվա ընթացքում: