Էդգար Հակոբյանը կարգազանց զինծառայող է եղել. ՊԲ-ն հերքում է

Ի պատասխան forrights.am կայքում հունվարի 19-ին հրապարակված «Պայմանագրային զինծառայողին պարբերաբար ծեծել են և նվաստացրել» վերտառությամբ հոդվածի՝ հայտնում ենք, որ այդտեղ ՊԲ զինծառայող Էդգար Հակոբյանի կողմից հնչեցված մտքերը լրիվությամբ աղավաղված են: Իսկ դեպքերի իրական պատկերը հետևյալն է.

Էդգար Հայկազի Հակոբյանը պայմանագրային հիմունքներով ՊԲ-ում ծառայում է 2017թ. մայիսի 1-ից: Իր 8 ամսվա ծառայության ընթացքում իրեն դրսևորել է որպես կարգազանց զինծառայող: Առաջին անգամ նա ծառայության չի ներկայացել 2017թ. նոյեմբերի 11-ին: Նոյեմբերի 13-ին ռազմական ոստիկանության աշխատակիցների կողմից բերման է ենթարկվել զորամաս, որտեղ զորամասի հրամանատարի կողմից Է. Հակոբյանի հետ տարվել է բացատրական աշխատանք: Սակայն նույն օրը զինծառայող Հակոբյանը կրկին ինքնակամ լքել է զորամասը: Նոյեմբերի 18-ին ռազմական ոստիկանության աշխատակիցների կողմից վերջինս բերման է ենթարկվել և զորամասի հրամանատարի կողմից նրան, որպես կարգապահական տույժ, հայտարարվել է 10-օրյա կալանք՝ կարգապահական վաշտում: 2018թ. հունվարի 5-ին Է. Հակոբյանը երրորդ անգամ չի ներկայացել ծառայության, ինչից հետո հիմք ընդունելով «Զինվորական ծառայություն և զինծառայողի կարգավիճակի մասին» ՀՀ օրենքի 54-րդ հոդվածի 1-ին մասին 7-րդ կետը («զինվորական ծառայությունից արձակում»՝ կարգապահական տույժ կիրառելիս), զորամասի հրամանատարի կողմից որոշում է կայացվել միջնորդել պաշտպանության բանակի հրամանատարին՝ Է. Հակոբյանին ծառայությունից ազատելու և պահեստազոր ուղարկելու մասին: Պաշտպանության բանակի հրամանատարի 2018թ. հունվարի 17-ի հրամանով Էդգար Հայկազի Հակոբյանն ազատվել է զինվորական ծառայությունից և ուղարկվել պահեստազոր:

Արցախի Հանրապետության պաշտպանության նախարարությունը հորդորում է հայրենական լրատվամիջոցներին հասարակության շրջանում մոլորություն չառաջացնելու համար զերծ մնալ չճշտված տեղեկատվության հրապարակումից:

Նշենք, որ forrights.am կայքին Էդգար Հակոբյանը ասել է, որ  Հունվարի 8-ի լույս 9-ի գիշերը Ռազմական ոստիկանության աշխատակիցները նրան տեղափոխել են ՌՈ քննչական բաժին, որտեղ մինչև առավոտյան ժամը 6-ը քննչականի պետը և ևս երկու աշխատակիցներ ծեծի են ենթարկել և հայհոյել, ապա տեղափոխել մեկուսարան: Շուրջ երկու ժամ անց Էդգարին կրկին տեղափոխել են քննչական բաժին, որտեղ պետը մի քանի անգամ ուժգին հարվածել է երիկամներին, որից հետո դուրս են բերել շենքից և ստիպել ծնկի գալ շարահրապարակում: