Խմիչքից խեր չկա. տոնական օրերին ալկոհոլային թունավորումից նաև կանայք են տուժել

Այս տարի Ամանորին ալկոհոլային թունավորման դեպքերը մի փոքր ավելի են եղել, քան նախորդ տարի: Այս մասին Yerkir.am-ի հետ զրույցում հայտնեց ՀՀ գլխավոր թունաբան Միքայել Գաբրիելյանը:

Ըստ նրա` այս տարի գրանցվել է ալկոհոլային թունավորման 28 դեպք՝ նախորդ տարվա 23-ի փոխարեն: «Չնայած դրան` այս տարի, բարեբախտաբար, մահվան դեպք չի արձանագրվել: Նախորդ տարի գրանցվել էր մահացության երկու դեպք, երկուսն էլ 50-ամյա տղամարդիկ էին` խրոնիկ ալկոհոլիկներ»,- ասաց Գաբրիելյանը:

Ի դեպ, այս տարի ալկոհոլից թունավորվածների թվում եղել են նաև կանայք:

Հիշեցնենք, որ Գաբրիելյանն ավելի վաղ տեղեկացրել էր, որ վերջին տարիներին Հայաստանում ալկոհոլային թունավորման դեպքերը բացառապես շատ խմելու հետևանքով են լինում, այլ ոչ թե խմիչքի որակի: