Թուրքիայում ալկոհոլային թունավորումից 65 մարդ է մահացել

Թուրքիայում կեղծ ոգելից խմիչքներից թունավորման հետևանքով մահացածների թիվը աճում է, իսկ անվտանգության ուժերը միջոցներ են ձեռնարկում ամբողջ երկրում թունդ խմիչքների ապօրինի արտադրության դեմ պայքարելու համար:

Չնայած բոլոր նախազգուշացումներին` Շանլըուրֆա և Այդըն նահանգներում գրանցվել է մահվան երկու նոր դեպք՝ ընդամենը երկու շաբաթվա ընթացքում զոհերի թիվը հասցնելով ավելի քան 65-ի. հայտնում է Hurriyet-ը։

Անվտանգության մարմինները գործողություններ են իրականացնում երկրի 81 նահանգում՝ ալկոհոլային խմիչքների ապօրինի արտադրության և վաճառքի համար պատասխանատու անձանց ձերբակալելու համար։

Կայսերի նահանգում իրականացված գործողության ընթացքում առգրավվել է ավելի քան երկու տոննա էթիլ սպիրտ, մեկ կասկածյալ կալանավորվել է։ Առգրավված ապացույցները ներառում են նաև մի քանի տասնյակ համային տեսականի և վաճառքի համար պատրաստ որոշակի քանակի կեղծ ալկոհոլ:

Թերթը նշում է, որ ալկոհոլային խմիչքների թանկացումը և դրանց վաճառքի սահմանափակումը պարարտ հող է ստեղծել խարդախների գործունեության համար և հանգեցնում է նրան, որ մարդիկ չեն կարողանում տարբերակել ապօրինի լաբորատորիաներում արտադրված ըմպելիքները։