Եթե որոշ մարգինալ ուժերի պետք են ցնցումներ, մեզ պետք է ուժեղ Հայաստան. Շարմազանով

«Ելք» դաշինքը` որպես խորհրդարանական ընդդիմություն, իրավունք ունի օրենքով սահմանված կարգով իրականսցնելու երթեր, ցույցեր, ինչն էլ անում է. խորհրդարանում լրագրողների հետ զրույցում ասաց ԱԺ փոխնախագահ Էդուարդ Շարմազանովը` անդրադառնալով «Ելք» դաշինքի այն հայտարարությանը, որ հունվարի 19-ից ընդդեմ թանկացումների բողոքի ակցիա են իրականացնելու:

«Մենք ապրում ենք ժողովրդավարական երկրում, և պետք չէ զարմանալ դրանից: Յուրաքանչյուր ժողովրդավարական երկրում կարող են լինել երթեր, ցույցեր: Ի՞նչ է, մենք ապրում ենք բռնատիրական երկրո՞ւմ, որ զարմանում եք: Մարդիկ էդպես են կարծում, թող անեն, ի՞նչ է եղել»,- ասաց Շարմազանովը:

Դիտարկմանը` Իրանի փորձը տեսանք, նա արձագանքեց. «Դուք Իրանի փորձն ուսումնասիրե՞լ եք, գիտե՞ք` Իրանում ինչ է: Այնտեղ միայն տնտեսական չէր, այնտեղ քաղաքական, սոցիալական տնտեսական, ներքաղաքական, ներիշխանական, նաև արտաքին քաղաքական էին խնդիրները:  Այսինքն` ճիշտ չէ 80 միլիոնանոց իսլամական երկիրն իր խնդիրներով կապել Հայաստանի հետ:  Իսկ եթե դուք ակնարկում եք բունտեր, ապա որևէ բունտով որևէ երկրում խնդիր չի լուծվելու»:

Շարմազանովը վերջում հավելեց. «Եթե որոշ մարգինալ ուժերի պետք են ցնցումներ, մեզ պետք է ուժեղ Հայաստան: Երբ ասում եմ` մեզ, խոսքը Հանրապետականին չի վերաբերում, այլ ամբողջ հասարակությունը: Ինչքան կայուն միջավայր լինի, ես չեմ ասում` ճահճացած, այլ` կայուն, այնքան մենք կարող ենք բոլոր ուղղություններով զարգանալ»: