Թուրքիան պատրաստվում է էլեկտրոնային համակարգեր տեղադրել Հայաստանի հետ սահմանին

Թուրքիայի ներքին գործերի նախարար Սուլեյման Սոյլուն հայտարարել է, որ Իրանի հետ սահմանին կառուցվող պատի շինարարական աշխատանքների կեսն ավարտվել է:

Ըստ Sputniknews-ի՝ Սոյլուն անդրադարձել է Հայաստանի և Վրաստանի  հետ  սահմանին իրականացվելիք անվտանգության միջոցառումներին՝ տեղեկացնելով, որ նշյալ պատը պետք է կանխի ապօրինի սահմանահատումները, ինչպես նաև ահաբեկիչների մուտքը երկիր:

Անդրադառնալով հայ-թուրքական և թուրք-վրացական սահմանին իրականացվելիք անվտանգության միջոցառումներին՝ Սոյլուն տեղեկացրել է, որ Թուրքիան պատրաստվում է այնտեղ տեղադրել էլեկտրոնային համակարգեր:

«1-2 ամսվա ընթացքում Արդահանում նմանատիպ միջոցառումներ կձեռնարկենք: Այս պահի դրությամբ այնտեղ պատ չենք կառուցում, սակայն կտեղադրենք նոր էլեկտրոնային համակարգեր»,- նշել է նա:

Հիշեցնենք, որ Թուրքիան ավելի վաղ սկսել էր հայ-թուրքական սահմանի` Կարս նահանգի հատվածում տեղադրած տեսախցիկների փորձարկման աշխատանքները: