Թուրքիան ռուսական ակումբի ամերիկացի մարզիկներին վիզա չի տրամադրել

Թուրքական «Ֆեներբահչե»-ի և ռուսական  «Նադեժդա» կանանց բասկետբոլային ակումբների հանդիպումից առաջ ռուսական կողմի 2 ամերիկացի բասկետբոլիստներ չեն կարողացել մուտք գործել Թուրքիա: Ըստ թուրքական «Haberler» լրատվամիջոցի՝ Թուրքիան ռուսական ակումբի 2 ամերիկացի մարզիկներ Էմմա Քանոնին և Բրիոնե Ջոնսին չի տրամադրել վիզա. տեղեկացնում է Ermenihaber-ը:

Բանն այն է, որ ԱՄՆ-ը և Թուրքիան դիվանագիտական խնդիրների պատճառով մի քանի օր է, ինչ միմյանց վիզա չեն տրամադրում: 

Թուրքական աղբյուրը հաղորդում է, որ ռուսական ակումբի նախագահ  Օլեգ Խրամկինը լրագրողների հետ զրույցում իր դժգոհությունն է հայտնել վերոնշյալ կապակցությամբ: Նա թուրքական կողմի  որոշումը որակել է որպես սկանդալային:

Հիշեցնենք, որ այն բանից հետո, երբ Թուրքիայում լրտեսության մեղադրանքով կալանավորվեց Ստամբուլում ԱՄՆ-ի գլխավոր հյուպատոսարանի աշխատակից Մեհմեթ Թոփուզը, պաշտոնական Վաշինգտոնը որոշում կայացրեց ժամանակավորապես վիզաներ չտրամադրել Թուրքիայի քաղաքացիներին: Ի պատասխան դրան՝ Թուրքիան էլ իր հերթին որոշեց վիզաներ չտրամադրել ամերիկացիներին: