Չնայած թանկացումներին` կառավարության մեկ տարին դրական եմ գնահատում. Դավիթ Տոնոյան

Այսօր խորհրդարանում լրագրողների հետ զրույցում ՀՀ ԱԻ նախարար Դավիթ Տոնոյանը վերջին շրջանում գրանցված հրդեհները համարեց ոչ միտումնավոր մարդկային գործոնի արդյունք:

«Չեմ կարող հիմա կոնկրետ պատճառներ հնչեցնել, քանի որ քննություն է ընթանում: Դա, ամենայն հավանականությամբ, մարդկային գործոնի արդյունք է, բայց ոչ միտումնավոր»,- ասաց նախարարը:

Դիտարկմանը` շատ շրջանառվեց այն տեսակետը, որ հրդեհները նման մասշտաբների հասան, քանի որ ԱԻՆ-ը չուներ համապատասխան տեխնիկա, Տոնոյանը պատասխանեց. «Ունենալու ենք հզոր տեխնիկա, ժամանակ է պետք»։

Խոսելով Բյուրականում ծագած հրդեհների մասին, որի պատճառը, ըստ մամուլում շրջանառվող լուրերի, անտառում ապօրինի ծառահատումների կոծկումն է եղել, նախարարը նշեց. «Դրանք ենթադրություններ են։ Նախաքննություն է իրականացվում»։

Լրագրողները նրանից հետաքրքվեցին նաև թանկացումների պատճառի և կառավարության գործունեության մասին: «Դեռ իմ պաշտոնավարման 7 ամիսն է լրացել, մեկ տարին կլրանա, կամփոփեմ: Ես կառավարության աշխատանքը բարձր եմ գնահատում»,- ասաց նա:

Հարցին` անկախ թանկացումներից` բա՞րձր է գնահատում, նախարարը պատասխանեց. «Այո, կառավարության մեկ տարին բարձր եմ գնահատում»:

Իսկ թե որքանո՞վ են իր գրպանի վրա ազդել թանկացումները, Դավիթ Տոնոյանը դժվարացավ պատասխանել: