Հայաստանում տարածված կարծիք կա՝ ազնիվ մարդը հարիֆ է․ Զարեհ Պալյան

Հայաստանում տարածված կարծիք կա՝ ազնիվ մարդը հարիֆ է, իսկ բացասական հատկանիշներ դրսևորողները համարվում են ճարպիկ ու շնորհքով.  լրագրողների հետ զրույցում ասաց Հայաստան-Սփյուռք համաժողովին մասնակից` ԱՄՆ-ում բնակվող հասարակական գործիչ Զարեհ Պալյանը։

Ըստ նրա՝ Հայաստանում շատերը պաշտոն ստանալուց հետո ժողովրդի շահերը պաշտպանելու փոխարեն երանության մեջ են ընկնում ու սկսում երկիրը թալանել, աղքատի չունեցած դրամից ինչ-որ բան խլել։ Սա, ըստ նրա, նշանակում է, որ փոխվելու փոխարեն վերնախավում կան մարդիկ, որոնք անում են ամեն ինչ, որպեսզի ժողովուրդը լքի Հայաստանը։

«Առաջին հերթին սրա առաջը պետք է առնել, սա մեզ դեպի անդունդ է տանում, Սփյուռքից սա ակներև տեսնում ենք»,- ասաց Պալյանը։

Խոսելով համաժողովի դերի մասին՝ նա նշեց, որ գործը պետք է առաջ ընկնի խոսքից, թե չէ՝ համաժողովներ, սեմինարներ, որևէ նշանակություն և արդյունք չեն կարող ունենալ։

Ի դեպ, Պալյանը նշեց, որ փորձել է Հայաստանում բիզնեսով զբաղվել, սակայն նրան այդպես էլ չի հաջողվել՝ չեն թողել: «Խնդիրն այն է, որ տեղի գործարարները մտածում են միայն իրենց հարստացման մասին՝ թույլ չտալով, որ մյուսներն էլ ինչ-որ բիզնես դնեն։ Ես, օրինակ, չորս անգամ փորձել եմ այստեղ բիզնես դնել, սակայն միշտ արգելել են, ինչը, բնականաբար, հոգեբանորեն ազդել է ինձ վրա, և այլևս չեմ ուզում նման փորձեր անել»,- ասաց նա։