«Այստեղ տղա կա՞». մանրամասներ՝ «Միմինո» սրճարանի սեփականատիրոջ դեմ մահափորձից

Տավուշի մարզի դատախազությունը նույն մարզի դատարան է ուղարկել Դիլիջանի «Միմինո» սրճարանի սեփականատիրոջ նկատմամբ սպանության փորձ կատարելու վերաբերյալ հարուցված քրեական գործը: Այս մասին Yerkir.am-ը տեղեկացավ դատական տեղեկատվական համակարգից:

Համաձայն մեղադրական եզրակացության ՝ Ռազմիկ Հախվերդյանը 2016թ նոյեմբերի 11-ին երեկոյան Դիլիջան քաղաքի «Միմինո» սրճարանում հասարակական կարգը կոպիտ կերպով խախտելու դիտավորությամբ ինքնահաստատման և շրջապատին հակադրվելու հանդուգն ձգտումով հնչեցրել է «Այստեղ տղա կա՞», ապա անհիմն վիճաբանել արձագանքած անծանոթ այցելուների հետ: Տղամարդն առանց հրավերի սեղանակցել, իր վարքագծով խաթարել է սրճարանի բնականոն աշխատանքը, շուրջ 15 րոպե կոպիտ կերպով խախտել հասարակական կարգը:

«Միմինո» սրճարանում խուլիգանություն կատարելու ժամանակ սրճարանի սեփականատիրոջ՝ Արմեն Մարտիրոսյանի հանդարտեցման կոչերին չենթարկվելու պատճառով առաջացած տարաձայնությունները հարթելու նպատակով Ռազմիկ Հախվերդյանը և Արմեն Մարտիրոսյանը նույն օրը մեկնել են Տավուշի մարզի Թեղուտ գյուղի սկզբնամաս:

Այստեղ Ռազմիկ Հախվերդյանը բարձրաձայն հայհոյանքներ տալով, խուլիգանական դրդումներով ապօրինաբար Արմեն Մարտիրոսյանին դիտավորությամբ կյանքից զրկելու նպատակով, իր մոտ եղած դանակով մի քանի անգամ հարվածել է Մարտիրոսյանի մարմնի տարբեր մասերին՝ նրա առողջությանը պատճառելով կյանքին վտանգ սպառնացող ծանր վնասվածք:

Ռազմիկ Հախվերդյանին մեղադրանք է առաջադրվել ՀՀ ՔՕ 34-104 –րդ հոդվածի 2-րդ մասի 10-րդ կետի և ՀՀ ՔՕ 258-րդ հոդվածի 1-ին մասի հատկանիշներով: Նրա նկատմամբ, որպես խափանման միջոց է ընտրվել կալանավորումը: Հիշյալը գործը մակագրվել է Տավուշի մարզի ընդհանուր իրավասության առաջին ատյանի դատավոր Զոյա Զաքինյանին: