Գյուղատնտեսության նախարարը չմեկնաբանեց՝ ինչու որդին չի ծառայել

Այսօր խորհրդարանում լրագրողների հետ զրույցում ՀՀ գյուղատնտեսության նախարար Իգնատի Առաքելյանը չցանկացավ մեկնաբանել, թե ինչու իր որդին չի ծառայել բանակում, և արդյո՞ք մյուս որդիները պատրաստվում են ծառայել, թե՞ ոչ: Նա նշեց, որ ՊՆ-ն պատասխանել է այդ հարցերին:

«Ինչ վերաբերում է իմ` հանրային պաշտոնն օգտագործելուն, ապա դա չի չարաշահվել, որովհետև դա եղել է մինչ իմ` նախարար նշանակվելը: Պատճառն արդեն անձնական է և ենթակա չէ բարձրաձայնման»,- նշեց Իգնատի Առաքելյանը:

Ճշտող հարցին, թե խոսքն առողջական խնդիրների մասի՞ն է, նախարարը պատասխանեց. «Հոդվածը, որը գրված է ՊՆ հայտարարության մեջ, ամեն ինչ ասում է»: