Չմեկնաբանեց իր մասին շրջանառվող լուրերը

ՀՀ մշակույթի նախարար Հասմիկ Պողոսյանն այսօր կայացած ճեպազրույցում ո'չ հերքեց, ո'չ էլ հաստատեց այն լուրերը, թե ինքը Ազգային գրադարանի տնօրեն Դավիթ Սարգսյանի հետ անձնական խնդիրներ ունի եւ մտմտում է Հովիկ Հովեյանի թեկնածության շուրջ: «Ես կարծում եմ, որ ոչ միայն անձնական հարցի, այլեւ սեփականաշնորհվող տարածքների վերաբերյալ հարցի պատասխանը կլինեն այն քայլերը, որոնք մոտ օրերս կլինեն հանրային գրադարանի հարցում»,- նշեց նա:

Նախարարը տեղեկացրեց, որ այս օրերին պետությունը զբաղված է պետական տարածքներն այլ վարձակալներից, օտարումներից եւ ապօրինություններից ազատելու գործընթացով, այլ ոչ թե հակառակը, եւ դրա ապացույցն են բոլոր այն դատական գործերը, որոնք մշակույթի նախարարությունը հարուցել է նախկինում կնքված պայմանագրերի վերաբերյալ:

«Այս պահին հանրային գրադարանի հիմնական շենքը վերանորոգվում է պետական բյուջեի միջոցների հաշվին, եւ նպատակը մեկն է, որ 2012 թվականին, որը հռչակվել է Գրքի տարի, Երեւանն էլ` գրքի մայրաքաղաք, մենք կարողանանք լիարժեք եւ նոր որակով ներկայանալ հանրությանը»,- ծանուցեց նախարարը:

«Իսկ մնացած մեկնաբանությունը` ծանոթ-բարեկամ, անձնական վերաբերմունք, եւ այլն, եւ այլն, ես կարծում եմ, որ դրա պատասխանը մենք ժամանակին կունենանք առանց այսօրվա իմ մեկնաբանության»,- ամփոփեց տիկին Պողոսյանը: