Սրտից վիրահատել են. Սեյրան Սարոյանն ասաց, թե ինչու չի ծառայել որդին

ԱԺ ՀՀԿ խմբակցության պատգամավոր, գեներալ Սեյրան Սարոյանը խորհրդարանում լրագրողների հետ զրույցում նշեց, որ չի կարող ասել՝ վերջին օրերի սահմանային լարվածությունը լայնամասշտաբ պատերազմի կհանգեցնի՞, թե՞ ոչ: «Հարկ եղած դեպքում բոլորս պիտի գնանք կռվի»,- հավելեց նա:

Դիտարկմանը՝ մենք նման ռեսուրսներ չունենք, հատկապես` տնտեսական, պատասխանեց. «Ամեն ինչ էլ ունենք»:

Ըստ պատգամավորի՝ հայկական կողմի պատժիչ գործողությունները համարժեք են հակառակորդի նախահարձակ գործողություններին, և հարկ եղած դեպքում  հարվածը կրկին չի ուշանա:

Իսկ պատրա՞ստ է Սեյրան Սարոյանն իր որդիներին, որոնցից մեկը չի ծառայել, մյուսը տարկետում է վերցրել, ուղարկել պատերազմ: Այս հարցին նա պատասխանեց. «Մուտիտներ են անում: Իմ որդիները ապրիլյանին մասնակցել են»: Սակայն ի պատասխան հարցին, թե ինչո՞ւ չեն ծառայել, բարկացած արձագանքեց. «Հիմա ասե՞մ՝ ինչի չեն ծառայել»։ Ստանալով դրական պատասխան՝ նա ասաց. «Սրտից վիրահատել են»:

Ըստ նրա՝ վիրահատվել է ավագ որդին՝ Զարզանդը: