Հոլանդիայում թուրքական հյուպատոսարանի վրա ահաբեկչական հարձակում է ծրագրված եղել

Ծրագրված է եղել 2016թ. հոկտեմբերին ահաբեկչական հարձակում իրականացնել Հոլանդիայի Ռոտերդամ քաղաքում գտնվող թուրքական հյուպատոսարանի վրա. տեղեկացնում է Ermenihaber-ը:

Ըստ թուրքական «Sabah» թերթի կայքի` այդ մասին  հայտնի է դարձել, երբ  Հոլանդիայի իրավապահ մարմինները հարցաքննել են 31-ամյա Ջաուդը Ա-ին, ով կասկածվում է «Իսլամական պետություն» (ԻՊ) ահաբեկչական կազմակերպության հետ կապեր ունենալու մեջ:

Հոլանդիայի  անվտանգության  և հետախուզության վարչության աշխատակիցներն  անցյալ տարվանից  հետևել են նշյալ անձին և գաղտնալսել նրա խոսակցությունները: Հարցաքննությունից հայտնի է դարձել, որ նա Թուրքիայի հյուպատոսարանի վրա հարձակումը ծրագրում էր իրականացնել այլ մարդկանց հետ, որոնց ինքնությունը դեռևս պարզված չէ:

Նշվում է, որ նրա տանն իրականացված խուզարկության ժամանակ հայտնաբերվել է ԻՊ-ի խորհդանիշ, «Կալաշնիկով» ինքնաձիգ և զինամթերք: Կասկածյալի իրավաբանը կտրականապես հերքում է առաջադրված մեղադրանքը: