Իմ երգերի ակունքը հայ ժողովուրդն է. Գևորգ Հաճյանը մայիսի 21-ին մենահամերգ կունենա

Մայիսի 21-ին Կոմիտասի անվան կամերային երաժշտության տանը տեղի կունենա երգիչ Գևորգ Հաճյանի մենահամերգը` «Ձոն հայոց ազգային բանակի» խորագրով, որը նաև մայիսյան հաղթանակներին է նվիրված: Մենահամերգի սկիզբը 19:00-ին է:

Yerkir.am-ի հետ զրույցում երգիչը հայտնեց, որ շաբաթներ առաջ հայ հոգևոր երաժշտական կենտրոնից իրեն հրավիրել են` մենահամերգ տալու, և ինքը համաձայնել է: «Իմ առաջարկով եղավ, որպեսզի մենահամերգը ձոն լինի հայոց հզոր բանակին`  հաշվի առնելով, որ Շուշիի ազատագրման 25-ամյակն էր մայիսի 9-ին, նաև մայիսի 28-ին Առաջին հանրապետության օրն է: Բացի այդ` մայիսը հաղթանակների ամիս է, ուրեմն իմ մենահամերգն էլ պետք է լինի Հայոց բանակին նվիրված` մայիսյան հաղթանակների կապակցությամբ»,- ասաց Հաճյանը:

Համերգը տեղի կունենա ՀՀ պաշտպանության նախարարության, ինչպես նաև ՀՕՄ-ի շրջանային վարչության, այլ հասարակական կազմակերպությունների, տարբեր անհատների աջակցությամբ:

«Ուրախ եմ, որ կրկին Հայաստանի հանդիսատեսի առաջ պիտի  բեմ  բարձրանամ: Այս մենահամերգս մյուսից իր բովանդակությամբ տարբերվում է: Կներկայացնեմ մի քանի հոգևոր երգեր` երգեհոնի նվագակցությամբ, դաշնամուրի նվագակցությամբ` ազգային հայրենասիրական ազգագրական երգեր կհնչեն, Կոմիտաս կհնչի: Ինձ նվագակցելու է  Մադաթ Ավանեսովը»,- ասաց նա:

Հաճյանի խոսքով` իր համար ավելի պարտավորեցնող է այս մենահամերգը, քանի որ բանակին է նվիրված: «Ինչո՞ւ է պարտավորեցնող, որովհետև ազգի գոյատևման համար Հայոց հզոր բանակն ունի մեծ առաքելություն: Իսկ երգն այնպես ուժեղ պետք է լինի, որ զինվորը նաև այդ երգով սնուցվի, նաև դրանով ինքն իրեն ամուր զգա»,- նշեց երգիչը` հավելելով` ուրախ է հայտարարել, որ համերգին ներկա են լինելու բազմաթիվ կուրսանտներ, տարբեր զորամասերի զինվորականներ, որոնց համար ինքը պարտավոր է երգել:

«Իմ ամեն օրվա արթնանալով ու քնելով պարտավոր եմ միայն հայ զինվորին, հետևաբար` այն, ինչը ես կարող եմ անել հայ զինվորի համար, պարտավոր եմ անել դա»,- հայտարարեց նա:

Հաջյանը տեղեկացրեց նաև, որ հրավիրված է Բոստոնի ՀՅԴ կոմիտեության կողմից` այնտեղ ևս համերգ տալու:  «Տարածքի ՀՅԴ երեք կոմիտեների համագործակցությամբ` հունիսի 3-ին պետք է տեղի ունենա մայիսյան հաղթանակներին, հատկապես` մայիսի 28-ին նվիրված ոգեկոչությամբ հաղթանակը նշելու ձեռնարկ, և որպես երգիչ` ես հրավիրված եմ` գաղափարակից ընկերներիս և հայրենակիցներիս հետ այդ փառավոր օրը նշելու համար»,- հայտնեց նա և հավելեց. «Ինձ համար հայը հայ է Հայաստանի մեջ և Հայաստանից դուրս: Իմ երգերի ակունքը հայ ժողովուրդն է, հայ հանդիսատեսը»: