Ընտրական գործընթացը երբևէ չպետք է դիտել որպես ականապատ դաշտ. Մուկուչյան

Տեղեկացրել էինք, որ երեկ Տարոն Մարգարյանի նախընտրական շտաբում Զարուհի Փոստանջյանի ու ոստիկանության միջև միջադեպ էր տեղի ունեցել. Փոստանջյանը մտել էր Մարգարյանի նախընտրական շտաբ` ասելով, որ պահարանում ընտրակաշառք ու ընտրացուցակներ կան: Ժամանած ոստիկանները բռնի կերպով դուրս էին հրավիրել Զարուհի Փոստանջյանին ու նրա աղջկան:

Լրագրողների հետ զրույցում ԿԸՀ նախագահ Տիգրան Մուկուչյանը, անդրադառնալով դեպքին, նշեց, որ չի կարծում` գրանցված միջադեպը կստվերի ընտրությունների արդյունքը: Ըստ նրա` դա միջադեպ էր, որը տեղի ունեցավ տեղամասային կենտրոններից դուրս, և նման միջադեպեր գուցե օրվա ընթացքում այլ քաղաքացիների հետ էլ են տեղի ունեցել: «Երբ, ընդհանուր առմամբ, նայում ենք ընտրական գործընթացին, որը տեղի էր ունեցել տեղամասային կենտրոններում, և որոնց կարելի էր ուղիղ հեռարձակման միջոցով հետևել, մեր դատողությունը մեկն է` ընտրական գործընթացը տեղի ունեցավ Ընտրական օրենսգրքի պահանջներին համապատասխան: Բացի այդ` ընտրական գործընթացը երբևէ չպետք է դիտել որպես ականապատ դաշտ, որտեղ մեկ քայլ աջ կամ ձախ տեղի է ունենում անդառնալի կորուստ»,- ասաց Մուկուչյանը:

Հարցին` մի՞թե շտաբն անձեռնմխելի տարածք էր, որտեղից  բռնի դուրս են բերել Փոստանջյանին, ԿԸՀ նախագահը պատասխանեց, թե խնդիրը ոչ թե տարածքի` անձեռնմխելի լինելու կամ չլինելու մեջ է, այլ այն բանի, որ բացառապես ասեկոսեների, ենթադրությունների, անհասկանալի աղբյուրներից ստացված տեղեկությունների հիմքով մուտք գործել որևէ ընտրական շտաբ և պարալիզացնել աշխատանքը, անթույլատրելի է: Ի վերջո, Մուկուչյանի կարծիքով, պետք է նկատի ունենալ, որ ընտրական շտաբները բացվում են, որպեսզի դրանց միջոցով կուսակցությունը կարողանա կազմակերպել իր պասիվ ընտրական իրավունքի իրականացումը: