Վարչատարածքային բարեփոխումները շարունակվում են

Այսօր` կառավարության նիստի օրակարգին անցնելուց առաջ, վարչապետ Կարեն Կարապետյանը հանձնարարական տվեց վարչատարածքային բարեփոխումների վերաբերյալ: Նրա խոսքով` բնակիչներին մատուցվող ծառայությունների մեծ մասն ուղղակի կամ անուղղակի իրականացվում է համայնքային մարմինների կողմից: Համայնքների խոշորացումն արդյունավետ իրականացնելու, բնակչությանը ճշգրիտ իրազեկելու և նախապատրաստական աշխատանքներ իրականացնելու, ինչպես նաև արդեն խոշորացված համայնքներում հետագա զարգացումներն ապահովելու նպատակով վարչապետը հանձնարարեց տարածքային կառավարման ու զարգացման նախարարին, մարզպետներին` տասնօրյա ժամկետներում կառավարության աշխատակազմին ներկայացնել վարչատարածքային փոփոխությունների ծրագրի վերաբերյալ համապատասխան օրենսդրական փաթեթ:

Նա հանձնարարեց կազմակերպել նշված օրենսդրական փաթեթով նախատեսված փոփոխությունների վերաբերյալ քննարկումներ ընդգրկված համայնքներում, ՏԻՄ-երում: ՏԿԶ նախարարին հանձնարարվեց մեկամսյա ժամկետում ամփոփել կատարված աշխատանքը և կառավարության աշխատակազմին ներկայացնել համապարփակ տեղեկատվություն:

ՏԿԶ նախարար Լոքյանը նշեց, որ հորդորել են ՏԻՄ-երին` քննարկել բիզնես բաղադրիչները և աութսորսինգով տալ կառավարիչներին: Նաև քննարկում են անցկացրել փոխվարչապետի մոտ, ձեռք է բերվել նախնական պայմանավորվածություն, որը կներկայացվի վարչապետին:

Վարչապետը հավելեց, որ գործընթացից մեծ արդյունավետություն է ակնկալում: