Նոյեմբերին վարչատարածքային փոփոխություններ կիրականացվեն Կապանում, Քաջարանում և Սիսիանում

ՀՀ տարածքային կառավարման և զարգացման նախարարի առաջին տեղակալ Վաչե Տերտերյանն այսօր աշխատանքային այց է կատարել Սյունիքի մարզ` Հայաստանում վարչատարածքային բարեփոխումների գործընթացին վերաբերող հարցերի քննարկման նպատակով:Խորհրդակցությանը, որը վարում էր ՀՀ Սյունիքի մարզպետ Վահե Հակոբյանը, ներկա էին ՏԿԶՆ աշխատակազմի տեղական ինքնակառավարման վարչության պետ Աշոտ Գիլոյանը, Կապան և Քաջարան տարածաշրջանների համայնքների ղեկավարները և ավագանու անդամները:

Բարեփոխումների գործընթացի շրջանակներում, նոյեմբեր ամսին վարչատարածքային փոփոխություններ են իրականացվելու Կապան, Քաջարան և Սիսիան համայնքներում: Կապանում միավորվելու են 32, Քաջարանում՝ 5, իսկ Սիսիանում 30 համայնքներ:

Վաչե Տերտերյանը համայնքի ղեկավարներին է ներկայացրել խոշորացման ծրագրերի սկզբունքներն ու մոտեցումները: Խորհրդակցությանը ներկայացվել են նաև Սյունիքի արդեն խոշորացված համայնքներում իրականացված և ընթացիկ աշխատանքները: Վաչե Տերտերյանը պատասխանել է համայնքների ղեկավարների ու ավագանու անդամների հարցերին, լսել նրանց առաջարկությունները: 

ՀՀ տարածքային կառավարման և զարգացման նախարարություն