Խաչատուրովի նշանակմամբ` ՀԱՊԿ-ն առավել ուշադրություն կդարձնի տարածաշրջանի անվտանգության խնդիրներին

Այսօր ՀԱՊԿ գլխավոր քարտուղար է նշանակվել Յուրի Խաչատուրովը: Նա 2009-2016թթ. զբաղեցրել է ՀՀ ԶՈՒ գլխավոր շտաբի պետը, իսկ 2016 թ. հոկտեմբերի 3-ին ՀՀ նախագահի հրամանագրով նշանակվել է ՀՀ ազգային անվտանգության խորհրդի քարտուղար՝ ազատվելով ՀՀ զինված ուժերի գլխավոր շտաբի պետի պաշտոնից:

Yerkir.am-ի հետ զրույցում, մեկնաբանելով այդ նշանակումը, քաղաքագետ Հրանտ Մելիք-Շահնազարյանը նշեց, որ Խաչատուրովի նշանակումը լավ առիթ է ՀԱՊԿ-ում մշակված քաղաքականությունն իրականացնելու և, որն ամենակարևորն է, մեր տարածաշրջանի խնդիրներին ավելի ուշադիր լինելու համար: Քաղաքագետւ խոսքով` Խաչատուրովն ունի փորձառություն, ազդեցիկ դեմք է, ու թեև ՀԱՊԿ-ը կոլեկտիվ որոշումները կայացնում է կոնսենսուսով, այնուամենայնիվ, կառույցն, այդ նշանակմամբ, առավել ուշադրություն կդարձնի Հայաստանի անվտանգության խնդիրներին:

Քաղաքագետ Սերգեյ Մինասյանը նույնպես կարծում է, որ Խաչատուրովի նշանակումից կտրուկ փոփոխություններ պետք չէ ակնկալել կառույցի քաղաքականության մեջ, սակայն ՀԱՊԿ-ը կարող է առավել զգայուն լինել և ուշադրություն դարձնել մեր տարածաշրջանի անվտանգության խնդիրներին: