Եթե քվեն կարևոր չլիներ, ընտրակաշառք չէին բաժանի. Արսինե Խանջյան

Տեղեկացրել էինք, որ այսօր լրագրողների հետ հանդիպեցին «Արդարություն Հայաստանի» նախաձեռնության անդամները, ովքեր օրերս են ժամանել Հայաստան` այստեղ կայանալիք ընտրական գործընթացին հետևելու:

Դերասանուհի Արսինե Խանջյանը նշեց, որ իրենց նախաձեռնության նպատակը Հայաստանում քաղաքացիական հասարակության ձևավորմանն աջակցելն է, ինչպես նաև Հայաստան-Սփյուռք կապն ամրապնդելը: «Մենք հասկացանք, որ Հայաստան-Սփյուռք կապն այնքան էլ ամուր չէ, և Սփյուռքը կտրված է շատ ու շատ հարցերից: Սակայն Սփյուռքը պետք է իր մասնակցությունն ունենա Հայաստանում ընթացող այս կամ այն գործընթացներին: Դրա համար էլ հիմա եկել ենք Հայաստան, որ ընտրությունների ընթացքին հետևենք, և թող ոչ ոք չասի, թե քվեն, ձայնը կարևոր չէ. եթե կարևոր չլիներ, ընտրակաշառք չէին բաժանի»,- ասաց նա:

Դերասանուհին նշեց նաև, որ իրենք միամիտ չեն և հասկանում են, որ ապրիլի 2-ից հետո չէ, որ պետք է երկիրը փոխվի, կամաց-կամաց կլինեն փոփոխությունները: Ըստ նրա` ոչ մի կուսակցություն էլ չպիտի որոշի` ով է հայն այսօր և ինչ ցանկություններ ունի, ժողովուրդն ինքը պետք է իր ապագայի տերը լինի: «Դրա համար էլ իրական կյանքում պետք է պայքարենք, թե չէ` սոցիալական կայքերում բարկանալը շատ դյուրին է: Քավ լիցի, ես չեմ ասում` փողոց դուրս գանք, 25 տարվա ընթացքում շատ «փողոց իջանք», և արյուն թափվեց, հիմա պետք է պայքարենք մեր իրավունքների համար խաղաղ ճանապարհով»,- նշեց նա: