Պաշտպանությունը միայն կրակելը չէ, բանակում շատերդ կարող եք ձեր գործառույթն իրականացնել

Այսօր ՀՀ ԿԳ նախարար Լևոն Մկրտչյանը հանդիպեց ավագ դպրոցի աշակերտների և բուհերի մի խումբ ուսանողների հետ: Հանդիպումը պաշտոնական չէր, նախարարն աշակերտների և ուսանողների հետ քննարկեց նրանց հուզող հարցերը:

Նա նախ նշեց, որ կրթական համակարգը ժամացույցի պես է` եթե մի մասնիկը չի աշխատում, մնացածի աշխատանքը կանգ է առնում: Մկրտչյանի հավաստմամբ` մենք ունենք մեր «կրթական ժամացույցը», և այն աշխատում է: «Ճիշտ է, մեր կրթական ժամացույցը շվեյցարական չէ, սակայն կարևորն այն է, որ մենք հասել ենք նրան, որ ստեղծել ենք մեր կրթական համակարգը: Կրթական համակարգը գործիք է` նպատակներն իրականացնելու համար, այն նաև ամենապատասխանատու գործիքն է` տեսակի պահպանման համար: Ուստի մենք իրավունք չունենք ստեղծելու իրավիճակ, որ մեր կրթական ժամացույցը կանգ առնի»,- ասաց նախարարը:

Նա նշեց նաև, որ մենք երկու խնդիր ունենք` ավագ դպրոցներ և մագիստրատուրա, քանի որ ստացվում է այնպես, որ ավագ դպրոցը կրկնում է  դպրոցի 10-ամյա ծրագիրը, իսկ մագիստրատուրան` բակալավրիատը: Այդ իսկ պատճառով, Մկրտչյանի հավաստմամբ, պետք է այնպես անել, որ ավագ դպրոցները նախ բեռնաթափվեն, իսկ դրանք էլ, իրենց հերթին, պետք է աշխատեն բուհերի հետ: «Բուհերը 12-րդ դասարանում պետք է մտնեն դպրոցներ, աշակերտները պետք է պրակտիկայի գնան: Բացի այդ` աշխարհի ոչ մի երկրում ընդունված չէ, որ բակալավրիատից հետո գնան մագիստրատուրա, քանի որ նախ իրենց գիտելիքներն աշխատաշուկայում են փորձում, հետո նոր որոշում` ինչ մասնագիտությամբ շարունակել մագիստրոսական կրթությունը»,- ասաց նախարարը:

«Քվանտ» վարժարանի սաներից Կառլեն Ավագյանը նշեց, որ երբ միջազգային բակալավրիատ ծրագրի դիպլոմ ես ստանում, այն քեզ 2 տարով է տալիս իր` որևէ բուհում ընդունելության դիպլոմը, սակայն, եթե մեկնես ծառայության, այդ դիպլոմով այլևս չես կարող ընդունվել որևէ բուհ /գործածության ժամկետը սպառվում է/: Կառլեն Ավագյանը հետաքրքրվեց, թե նախարարությունն ի՞նչ քայլեր է անում այս ուղղությամբ` արդյո՞ք տարկետում պետք է տրվի նման դեպքերում:

ԿԳ նախարարը նշեց, որ մեր երկրի իրավիճակն այնպիսին է, որ մենք մեր ուժերը մոբիլիզացնելու խնդիր ունենք: «Ի պատիվ մեր ժողովրդի` մենք այն քիչ ժողովուրդներից ենք, որը 25 տարի մարտական հերթափոխ է իրականացնում, քանի որ անընդհատ գտնվում ենք պատերազմական իրավիճակում: Ու հիմա, քանի որ մարդկային ռեսուրսի խնդիր կա, որոշվեց, որ բոլոր տղաները պետք է մեկնեն ծառայության: Բայց եղան բացառություններ, ինչը հանգեցրեց անարդարության: Օրինակ` նույն կուրսի ուսանողներից 14-ին տանում են բանակ, իսկ մեկին` ոչ, և  չափանիշը բանակ չտանելու քննությունը ընդամենը 0,5 բալով բարձր ստանալն է: Սա, կարծում եմ, այնքան էլ ճիշտ չէ»,- ասաց նախարարը:

Նա նշեց նաև, որ, ճիշտ է, կան մասնագիտություններ, որոնք անընդհատ աշխատանք են պահանջում, օրինակ` բնագիտական մասնագիտությունները, և այս դեպքում պետք է քայլեր արվեն, որպեսզի երեխան բանակում չկտրվի իր ընտրած մասնագիտությունից: «Կարծում եմ` ճիշտ կլինի, որ կա՛մ բոլորը գնան բանակ, կա՛մ չգնան: Իսկ կոնկրետ այս դեպքում մենք կարող ենք պայմանավորվածություն ձեռք բերել միջազգային բակալավրիատի հետ, որպեսզի բանակ գնալու պարագայում ձեր վկայականի ժամկետը երկարի, այսինքն` այն 4 տարի լինի ուժի մեջ»,- ասաց նախարարը:

Արտաշես Շահինյանի անվան ֆիզիկամաթեմատիկական հատուկ դպրոցի աշակերտ Խաչատուր Նազարյանն էլ նշեց, որ ընդունվել է միջազգային բուհ և հիմա չգիտի` իրեն տարկետում տալո՞ւ են, որ չմեկնի ծառայության: Ըստ աշակերտի` տարկետում չստանալու և բանակ գնալու դեպքում ինքը հետո չի շարունակի ուսումը, քանի որ, Արտաշեսի մեկնաբանմամբ, երբ մեկ տարի սովորի բուհում, իսկ հետո երկու տարի անցկացնի բանակում` կտրված լինելով գիտությունից, ուղղակի անհնար կլինի կրկին գիտություն վերադառնալ:

Ի պատասխան` ԿԳ նախարարը նշեց, որ տվյալ դեպքում, օրենքով սահմանված կարգով, աշակերտը կստանա տարկետում: Սակայն, ըստ նրա, կարևորը ոչ թե տարկետման խնդիրն է, այլ բանակում  համապատասխան միջավայր ստեղծելը, որ, օրինակ, ֆիզիկայով զբաղվողները շարունակեն իրենց աշխատանքը: «Այո, մենք մասնագիտության պահպանման խնդիր ունենք, և հնարավոր է` ֆիզիկայի ինստիտուտի հետ համագործակցության միջոցով այնպես անենք, որ դուք և՛ ձեր ծառայությունն իրականացնեք, և՛ գիտությունից չկտրվեք` միաժամանակ լուծեք խնդիրներ, որոնք կապված են պաշտպանության ոլորտի հետ: Պաշտպանությունը միայն կրակելը չէ,  բանակում շատերդ` ֆիզիկոսներ, բնագետներ, կարող եք ձեր գործառույթն իրականացնել»,- նշեց Մկրտչյանը: