Ո՞ր մեկը ձուկը ջրում բազար կարող է անել. Վարդան Այվազյան

ՀՀԿ խմբակցության պատգամավոր Վարդան Այվազյանը Yerkir.am-ի հետ զրույցում նշեց, որ իրականությանը չեն համապատասխանում այն լուրերը, թե ՀՀԿ-ում ցուցակների հետ կապված դժգոհություններ կան:

«Ամեն դեպքում դա միանշանակ չէ: Կարող են լինել և’ գոհեր, և’ դժգոհներ: Ինչ վերաբերում է Վարդան Այվազյան անձին, շատ նորմալ եմ համարում, որ համամասնական ցուցակի 159-րդ համարն եմ»,- ասաց նա` հավելելով, որ ռեյտինգային ցուցակում էլ է ընդգրկված:

Իր` խորհրդարան անցնելու շանսերը Այվազյանը համարում է բավականին նորմալնի:  «Իմ շանսերը գնահատողն ազգաբնակչությունն է, եթե նրանք չգնահատեին ինձ, բնականաբար, ես ռեյտինգային ցուցակով չէի գնա: Իմ շանսերը համարում եմ բավականին նորմալ, գտնում եմ, որ այդ շանսերն ունեմ»,- ընդգծեց պատգամավորը:

Նրանից հետաքրքվեցինք` արդյո՞ք իր հետ քննարկում են, որ խորհրդարանական ընտրություններից հետո ոչ թե խորհրդարանում հայտնվի, այլ մեկ այլ պաշտոն զբաղեցնի: Այվազյանն արձագանքեց. «Նախքան ընտրությունները այլ պաշտոն զբաղեցնելու հետ կապված որևէ քննարկում չի կարող լինել: Ո՞ր մեկը ձուկը ջրում բազար կարող է անել»:

Վերջում պատգամավորը կատակեց. «Սա է ՀՀԿ համամասնական ցուցակի 159-րդ համարը զբաղեցնող Այվազյան Վարդանի կարծիքը»: