«Բելոռուսներն ու ղազախները բազար են անում, որ օգուտ քաղեն, իսկ մենք խելոք աշակերտի նման շտապում ենք»

Այսօր ԱԺ արտահերթ նիստում քննարկվում է մաքսային կարգավորումներ նախատեսող օրենքների փաթեթը:

Հիմնական զեկուցող` ՀՀ ֆինանսների փոխնախարար Վախթանգ Միրումյանը նշեց, որ մաքսային հայտարարագրող կարող է լինել ինչպես ապրանքներ տեղափոխող անձը, այնպես էլ մաքսային ներկայացուցիչը: ՄՄ անդամ երկիր արտահանվող կամ այնտեղից ներմուծվող հայտարարագրումը մաքսային տարանցումն է, որն էլ ենթադրում է մաքսային վճարներ: Ըստ փոխնախարարի` արտահանվող ապրանքները հայտարարագրվում են տասնօրյա ժամկետում, մաքսային վճարները նույնպես կատարվում են տասնօրյա ժամկետում:

ԱԺ ընդդիմադիր պատգամավոր Ալեքսանդր Արզումանյանը հարց ուղղեց ֆինանսների փոխնախարարին` նախապես ասելով, որ իր հարցը չի վերաբերում մաքսային կարգավորումներին: «Դեմ լինելով ԵՏՄ-ին Հայաստանի անդամակցությանը` ես այս օրենքների ամբողջ փաթեթներին դեմ եմ քվեարկելու: Ինձ ուղղակի մեր շտապողականությունն է հետաքրքրում` շըփ-թըփ, արագ ու արտահերթ ռեժիմով, այն դեպքում, երբ դեռ հասկանալի չէ` ԵՏՄ անդամ երկրները ուզո՞ւմ են, որ մենք անդամակցենք: Այնպիսի տպավորություն է, որ այս քաղաքական ողջ գործընթացը թևակոխել է շուկայական փուլ: Ոնց որ Ամանորին ընդառաջ տոնավաճառ լինի, և մեր երկու պարտնյորները փորձում են մաքսիմումը Մաքսայինից պոկել, և էդ պոկելու դիմաց է լինելու մեր անդամակցության հարցը վավերացնելը, այս պայմաններում ավելի ճիշտ չէ՞` մենք էլ, այդ բազարների մեջ մտնելով, փորձենք մաքսիմալ օգուտներ քաղել: Իսկ մենք խելոք աշակերտի նման մեր տնային աշխատանքն ենք կատարումԼ: Ո՞ւր ենք շտապում, անհրաժե՞շտ է մեր շտապողականությունը: Նայենք, տեսնենք, թե ինչ կստանան մեր բելոռուս ու ղազախ բարեկամները, ճիշտ չէ՞ր լինի գնալ համապատասխան մայրաքաղաքներ ու աԱմանորին ընդառաջ շահավետ պայմաններ ստանալ»:

Վախթանգ Միրումյանը նշեց, որ ԵՏՄ-ից առավելագույն օգուտներ քաղելու բանակցություններն ավարտված են: